د څلورو معترضو مېرمنو خپلوان له بنده د دوی د خلاصون پخلی کوي؛ خو له هغه څه چې تر فشار لاندې نیول ښيي، شکایت لري.
پروانه ابراهیم خېل، تمنا پریاني، زهرا محمدي او مرسل هغه څلور معترضې مېرمنې دي چې، د نږدې څلورو اوونیو په لړ کې په جلا جلا توګه په کابل کې نیول شوې وې؛ خو بالاخره ټولې آزادې کړل شوې.
خو د دغو څلورو معترضو ښځو خپل خپلوان ادعا کوي چې، دغه آزادې شوې ښځې د فشار له امله حاضرې نه دي چې، د خپلې نیونې په تړاو جزییات له رسنیو سره شریکې کړي.
د عدالت غوښتونکو مېرمنو د غورځنګ غړې نازدانه وايي:«دا یو ښه خبر و چې له څو اوونیو وروسته خبر شوو، هغه نجونې چې د طالبانو په بند کې وې ازادې شوې او دا مېرمنې دې ته هیله منې کوي چې طالبان د ښځو په تړاو خپلې ژمنې عملي کوي.»
د یوې ازادې شوې مېرمن له خپلوانو محصومه هم څرګندوي:«زموږ دغه همکارانې په داسې حال کې ازادېږي چې طالبانو په ځلونو د هغوی له نیولو انکار کړی وو، دا وضعیت موږ تر کله وزغموو، بس ده باید دغه وضعیت ته د پای ټکی کېښودل شي.»
د دغو ښځو آزادېدل د ملګرو ملتونو له هرکلي سره مخ شوي او د دغه سازمان د ښځو څانګه په یوې اعلامیه کې وايي:«افغان ښځې د خپلو حقونو لپاره د مبارزې په برخه کې ډېره اوږده مخینه لري او په ډېریو حالاتو کې له ګڼو خنډونو سره مخ شوې دي. د ښځو له حقونو د دفاع مسوولیت نه ښايي چې، یوازې د افغان ښځو پر اوږو وي؛ بلکې دا زموږ د ټولو ګډ نړۍوال مسوولیت دی.»
خو اسلامي امارت د دغې ادعا په ځواب کې وايي چې د حقیقت موندنې لپاره څېړنې روانې دي او وروستۍ شوې نه دي.
د اسلامي امارت د ویاند مرستیال بلال کریمي په دې هکله وايي:«دا موضوع موږ ته نه ده رسېدلې او موږ کولای شو چې د هغه په هکله څه ووایوو ځکه چې د معلوماتو په لټه کې یوو نه شوو کولای چې تایید یې کړو.»
له بل لوري یو شمېر ښځې ادعا لري چې، تېره شپه د مدینې او مرجان په نومونو دوه نورې معترضې په کابل کې د امنیتي ځواکونو له لوري نیول شوي او نامعلوم ځای ته بیول شوې دي.
د ښځو د حقونو فعالې نویدې خراساني وویل:«مدینه او مرجان تېره شپه او مدینه له خپلو دوو ماشومانو سره نیول شوې ده او نامعلوم ځای ته بیول شوې ده او دا د اندېښنې ځای دی. موږ نه پوهېږو چې دغه نجونې به ترکله د طالبانو په بند کې پاتې وي.»
امنیتي بنسټونو لا تر اوسه په دې تړاو په رسمي توګه څه نه دي ویلي.
په دې اړه مو اندونه