د افغانستان د خبریالانو او رسنیو فدراسیون په هېواد کې د رسنیو مالي وضعیت د اندېښنې وړ بولي او خبرداری ورکوي چې که د رسنیو اقتصادي ننګونې ژر تر ژره هواره نه شي، تر شپږو میاشتو به په هېواد کې هېڅ رسنۍ فعاله نه وي.

د دغه فدراسیون مسوولینو پرون په کابل کې په یوه غونډه کې وویل چې له وروستیو سیاسي ناندریو وروسته رسنۍ تر بل هر سکتور زیاتې زیانمنې شوې دي.

د رسنيو او خبريالانو د فدراسيون غړي حجت الله مجددي وويل: "نن ورځ له دې امله چې موږ رسنۍ نه شو کارولى، رسنۍ بندې دي. دوی نورو کاروبارونو او دندو ته مخه کړې او یو شمیر داسې خبریالان هم شته چې ورته د نورو دندو چاپیریال هم مناسب نه دی. له بده مرغه، دوی په ستونزو کې دي او نشي کولی د ورځې په پای کې خپلې کورنۍ ته پنځه ډوډۍ راوړي."

دغه فدراسيون په يوه اعلاميه کې له اطلاعاتو او کلتور وزارت څخه وغوښتل چې د رسنيو د سرغړونو د څيړنې د کميټې کار بيا پيل کړي او اطلاعاتو ته د لاسرسي په برخه کې له خبريالانو سره مرسته وکړي.

په بیان کې خبرداری ورکړل شوی چې که مالي ننګونې او معلوماتو ته د لاسرسي ستونزه حل نشي ټولې رسنۍ به وتړل شي.

د رسنيو او خبريالانو د فدراسيون غړي ديندار امرخيل وويل: "موږ د اطلاعاتو او کلتور له وزارت څخه غوښتنه کوو چې د برشنا شرکت له خوا په تيرو کلونو کې د بريښنا د لوړ لګښت د کمولو او په دې برخه کې لګول شوي ماليات معاف کړي.."

خو په دې غونډه کې يو شمېر خبريالانو د هېواد پر خراب اقتصادي وضعيت اندېښنه وښوده او پر هغو بنسټونو يې غږ وکړ چې د خبريالانو ملاتړ کوي ترڅو له خبريالانو سره په صادقانه توګه همکاري وکړي.

خبريالې مينه حبيب وويل: "که دا پيسې په سمه توګه اداره شوې وای، نن به خبريال هيڅکله له اقتصادي بحران او ورته اقتصادي ستونزو سره لاس او ګرېوان نه و. "

احمد تنها یوه بل خبریال وويل: "د رسنيو د ساتنې هغه بنسټونه چې دلته راغلي او فدراسيون يې جوړ کړى، هغوى بايد په راتلونکي کې هم د تېرو بنسټونو په څېر دا تضمين راکړي چې خیانت به نه کوي د نورو بنسټونو په شان چې د لېږد په برخه کې يې ټول ځانونه او خپلوان د خبریال په نامه و ایستل، له بده مرغه د دې ټولو تکرار کول ناورین دی."

د رسنیو د فدراسیون او خبریالانو د معلوماتو له مخې، د یوناما له چارواکو سره په لیدنه کې چارواکو ژمنه کړې، چې د اروپايي ټولنې له ۶۰۰ میلیونه ډالرو مرستې څخه به هم رسنۍ او خبریالان ګټه پورته کړي.

د رسنیو او ژورنالیستانو د فدراسیون د رهبرۍ غړي حفیظ الله بارکزي وویل: اروپا دا مهال غواړي د افغانستان له خلکو سره مرسته وکړي او موږ په سکیجول کې له نیکه مرغه د رسنیو او خبریالانو لپاره خپل پروګرام لرو.

په همدې حال کې د اطلاعاتو او کلتور وزارت وايي، د هېواد د رسنیو پر وړاندې د شته ننګونو د هواري لپاره به کار وکړي.

د اطلاعاتو او کلتور وزارت د خپرونو رییس عبدالحق عماد وویل: "مونږ او تاسو یوازې شپږ میاشتې انتظار باسو، یوازې شپږ میاشتې موږ له دې کړکېچ څخه راوځو. ګورئ، وطن په مونږ حق لري وطن مو مورده."

د جمهوري ریاست له ړنګېدو مخکې په هېواد کې شپږ سوه ۲۳ رسنۍ فعالې وې، خو ځینو بنسټونو ویلي، چې له دې جملې څخه دری سوه اتلس رسنۍ له تېرو شپږو میاشتو راهیسې غیر فعالې دي.