د چین د بهرنیو چارو وزیر وانګیې په افغانستان کې د اسلامي امارت له بیا راتګ وروسته په لومړي ځل نن (پنجشنبه) کابل ته راغی. ټاکل شوې نوموړی په افغانستان کې د سرپرست حکومت له چارواکو سره د سیاسي، اقتصادي او ټرانزیټ موضوعاتو په اړه خبرې وکړي.
له دې سره هممهاله نن (پنجشنبه) له غرمې وروسته د سرپرست حکومت له چارواکو سره د لېدنې لپاره یو روسي پلاوی هم کابل ته راغلی دی.
د بهرنیو چارو وزارت د دې سفرونو هرکلی کړی او وايي، اوسمهال په افغانستان کې نړیوالې پانګهونې ته زمینه برابره شوې ده.
د بهرنیو چارو وزارت مرستیال ویاند احمد ضیا تکل طلوعنیوز ته وايي: «ښاغلي وانګیې د مثبتو امنیتي تغیراتو راتګ ستاینه کړې او له افغانستان سره یې په بشري او پرمختیايي برخو کې د مرستیو یادونه کړې.»
د چین دې لوړپوړي چارواکي د ریاستالوزرا لومړي مرستیال ملا عبدالغني برادر سره د لېدنې پر مهال ویلي، هېواد یې چمتو دی چې د افغانستان په اقتصادي، کان کیندنې او د انرژي تولید برخو کې پانګهونه وکړي.
د سیاسي چارو کارپوه طارق فرهادي په دې اړه طلوعنیوز ته وايي: «چین په افغانستان کې د خپلو ګټو لپاره رامخته شوی دی، خو تر څو پورې د ټولګډونه حکومت په اړه ډاډه نهشي، حکومت په رسمیت نه پېژني.»
د اقتصادي چارو کارپوهان د افغانستان په اوسني وضعیت کې د نورو هېوادونو له لوري پانګهونه مهمه بولي.
د اقتصادي چارو کارپوه شبیر بشیري په دې اړه وايي: «د افغانستان کرنیزو محصولاتو په تېره وچې مېوې لپاره چین ښه بازار دی او له سیمې هېوادونو سره د افغانستان سوداګریزو او اقتصادي اړیکو پراخول کولای شي د افغانستان اقتصادي ودې او بشري بحران له مدیریت سره مرسته وکړي.»
که څه هم د بېلابېلو هېوادونو په تېره د ګاونډیو هېوادونو چاروکو په وروستیو میاشتو کې افغانستان ته راغلل، خو تر دې مهاله هېڅ هېواد په افغانستان کې سرپرست حکومت په رسمیت نهدی پېژندلی.
په دې اړه مو اندونه