ځېنې هېوادوال د هېواد په بېلابېلو ولایتونو په ځانګړې توګه په کابل، خوست او کندهار کې د بې پيلوټه الوتکو ګرځېدېدل د هېواد په هوايي حریم کې د اندېښنې وړ ګڼي.
دوی وايي چې نه پوهېږي دغه الوتکې د کوم هېواد دي او د کومې موخې په پار د افغانستان په هوايي حریم کې ګرځي.
دغه مسله په خوست کې ډېره توده شوې ده. د دغه ولایت اوسېدونکو د دوشنبې په ورځ د یوه لاریون پرمهال له امنیتي ادارو په دې تړاو د وضاحت غوښتنه وکړه.
د خوست اوسېدونکی احساس وايي:«په دې وروستیو کې بې پیلوټه الوتکې په خوست ولایت کې ګرځي. د خلکو په منځ کې دا اندېښنه رامنځته شوې ده چې دا الوتکې په کوم هېواد پورې اړوندې دي.»
د خوست بل اوسېدونکی شریف الله:«د خوست د ټولو خلکو په منځ کې دا اندېښنه پيدا شوې چې دا الوتکې د چا دي، نو زموږ غوښتنه له اسلامي امارته دا ده چې د دغو الوتکو په هکله خلکو ته معلومات ورکړي چې دغه الوتکې په چا پورې اړه لري او د څه لپاره ګزمې کوي.»
د کندهار یو شمېر اوسېدونکي هم وایي، چې په وروستیو ورځو کې یې د دغه ولایت د بېلابېلو سیمو په فضا کې بې پيلوټه الوتکې لیدلې دي.
د کندهار یو تن اوسېدونکي وویل:«ډېری شپې موږ په کندهار کې د بې پیلوټه الوتکو غږ اورېدلی او د دې ترڅنګ په ټولنیزو رسنیو کې هم اورېدلي چې په نورو ولایتونو کې هم شتون لري.»
په دې وروستیو کې د هېواد پر هوايي حریم د بې پېلوټه الوتکو ګرځېدو پوښتنې راولاړې کړې دي.
د پوځي چارو شنونکی اسدالله ندیم څرګندوي:«شونې ده چې ګاونډي هېوادونه وي او یا لېرې ځواکمن هېوادونه وي او دا په هغوی پورې اړه لري، دا یوه مسله ثابت وي چې د افغانستان هوايي قلمرو څېښتن نه لري.»
اسلامي امارت هم له دې پرته چې د بې پيلوټه الوتکو د ګرځېدو د څرنګوالي په تړاو جزیات ورکړي، وایي، چې اوس مهال افغانستان هېڅ هېواد ته ګواښ نه دی او باید د افغانستان ځمکنی او هوایي حریم نقض نه شي.
د اسلامي امارت د ویاند مرستیال بلال کریمي وايي:«اوس چې زموږ د هېواد امنیت تامین شوی او زموږ له هېواده هېڅ هېواد ته کوم ګواښ متوجه نه دی، نو اړتیا نشته چې زموږ د هېواد د فضا په ګډون کوم کس او یا کوم هېواد لاسوهنه وکړي.»
د کابل د هوایي ډګر د عملیاتو د برخې یوه سرچینه هم تاییدوي،چې کله ناکله د دغه هوایي ډګر د رادار پر/ پرده د ۳۵ زره فوټه په لوړوالي سره بې پيلوټه الوتکې ترسترګو کیږي، خو څرګنده نه ده،چې دغه الوتکې په کوم هېواد پورې اړوند دی او کوم هدف تعقیبوي.
په دې اړه مو اندونه