د پروان امنیتي چارواکي وايي، د دې ولايت په مرکز چاریکار کې يې د داعش ډلې د ناچاودو توکو او وسلو یوې ډیپو ته چاودنه ورکړې ده.
دوی زیاتوي چې د دې ډيپو د ساتلو په تړاو د یوې ښځې په ګډون درې کسان نیول شوي هم دي.
د پروان ولایت د امنیې قومندانۍ ویاند محمد کامران حبیبي وايي: «پهدې کور کې د هاوان پنځوس مرمۍ، دوه قبضې راکټ او د راکټ پنځوس مرمۍ وې. همداراز د ځانمرګو دوه واسکټونه، یو هینو موټر او درې منه ناچاودي توکي.»
بلخوا د پروان یو شمېر اوسېدونکي وايي، دې ډيپو ته له چاودنې وروسته د سیمې اوسېدونکو ته درانه زیانونه اوښتي دي.
دوی ادعا کوي چې پهدې پېښه کې پینځه تنه ملکی کسان هم ټپیان شوي دي.
یو زیانمن داوود وايي: «پهدې سیمه کې نږدې سل کورنه دي، ښیښې یې ماتې شوي.»
یو شمېر زیانمن کسان وایي، ناوړه اقتصادي وضعیت ته په پام سره دوی د خپلو کورونو د بیارغونې وس نهلري او له حکومته غواړي چې خساره یې ورکړي.
د مایل په نوم یو زیانمن وايي: «خلکو ته ډېر زیات زیان رسېدلی دی، د خلکو د کورونو دروازې او ښیښې ماتې شوې دي.»
یو بل زیانمن حامد وايي: «له حکومته غواړو چې له موږ سره مرسته وکړي، څو د کورونو ښيښې مو بیا جوړې کړو.»
که څه هم د پروان ولایت امنیتي مسوولان نیول شوي کسان او ناچاودي توکي او وسلې د داعش ډلې اړوند ګڼي، خو تراوسه داعش ډلې پهدې اړه غبرګون نهدی ښودلی. په چاریکار ښار کې له دې مخکې هم دې ته ورته پېښې شوې دي.
په دې اړه مو اندونه