طلوعنیوز د ۲۰۲۲ کال د "ون ورلډ میډیا" بنسټ له لوري د ځانګړې جایزې ګټوونکی اعلان شو.
د سږ زېږیز کال "ون ورلډ میډیا" بنسټ د جایزې ډالۍ ګټلو لپاره له افغانستان، پېرو او یوګانډا څخه درې رسنۍ نوماندې شوې وې چې طلوعنیوز د انګلیسي وتلي خبریال جان سنو له لوري د دې جایزې ګټونکی اعلان شو.
جان سنو چې په دې مراسمو کې یې په انلاین ډول ګډون کړی و، ویلي، دا جایزه هغو رسنیو ته ډالۍ کېږي چې د حق او عدالت لپاره مبارزه کوي.
نوموړي زیاته کړې: «لکه څرنګه چې موږ اورېدلي د پېرو، افغانستان او یوګانډا نوماندې رسنۍ ډېرې ښې دي... یوازې یوه ګټونکې رسنۍ شته چې هغه طلوعنیوز ده.»
د بيبيسي خبریالې یلدا حکیم د طلوعنیوز په استازیتوب دا جایزه تر لاسه کړې ده.
اغلې حکیم د دې مراسمو ګډونوالو ته ویلي، ویاړي چې په طلوعنیوز کې د همکارانو په استازیتوب دا جایزه تر لاسه کوي او زیاتوي: «دا په افغانستان کې ښځینه خبریالانو په تېره په طلوعنیوز کې ښځینه خبریالانو ته ډالۍ کوم.»
د "ون ورلډ میډیا" جایزه په بریټانیا کې د "اسکا رسنیو" په څېر مشهوره جایزه بلل کېږي.