د پاکستان د بهرنیو چارو وزیر وايي، اسلاماباد به د افغانستان له سرپرست حکومت سره د تحریک طالبان پاکستان پر ضد او د ترهګرو ډلو د ګواښونو د مخنیوي لپاره کار وکړي.
دغه لوړپوړي پاکستاني چارواکي له "الجزیرې ټلوېزیون" سره په مرکه کې ویلي، هېواد یې د افغانستان له سرپرست حکومت سره د خپلې بهرنۍ تګلارې او د سیمې هېوادونو د ګټو پر بنسټ تعامل کوي.
د پاکستان د بهرنيو چارو وزير بلاول بوټو زرداري وايي: «تر څو چې دا سرپرست حکومت په افغانستان کې وي، موږ به د خپلې بهرنۍ تګلارې پر بنسټ، چې د ګاونډيو هېوادونو په اړه يې لرو او د سيمې د هېوادونو د ګټو پر بنسټ له دوی سره تعامل کوو.»
دغه لوړپوړی پاکستانی چارواکی زياتوي، په پاکستان کې د پاکستاني طالبانو تحریک یا «ټيټيپي» حملې دوام لري او له ترهګريزو ډلو سره د مبارزې په اړه به د سرپرست حکومت له چارواکو سره خبرې وکړي.
د پاکستان د بهرنيو چارو وزير زیاتوي: «له بده مرغه، ترهګریز بریدونه دوام لري او موږ تمه لرو چې په افغانستان کې له خپلو ګاونډیانو او هلته له سرپرستو چارواکو سره د ترهګرو سازمانونو د ننګونو د له منځه وړلو لپاره کار وکړو.»
بل لوري ته اسلامي امارت وايي، د پاکستاني طالبانو تحريک د دې هېواد داخلي موضوع ده او د افغانستان له خاورې نورو هېوادونو ته هېڅ ګواښ پېښ نهدی. د اسلامي امارت مرستيال وياند وايي، د ګاونډيو هېوادونو امنيت ټينګښت د ټولو هېوادونو په ګټه دی.
د اسلامي امارت مرستيال وياند بلال کريمي وايي: «اسلامي امارت له ټولو هېوادونو سره، په ځانګړې توګه له ګاونډيو هېوادونو سره په ښو حسنه روابطو باور لري. کومه موضوع چې تاسې يې يادونه کړې، هغه د پاکستان خپله داخلي موضوع ده. اسلامي امارت لکه څنګه چې د خپل هېواد لپاره مهم بولي، دغه راز د ګاونډيو هېوادونو امنيت هم د ټولو په ګټه دی.»
تر دې وړاندې په افغانستان کې د پاکستاني طالبانو تحريک او اسلاماباد تر منځ څو پړاوه مذاکرات تر سره شول چې په پایله کې د ټي ټي پي او اسلام آباد تر منځ اوربند وشو.
خو پاکستاني طالبانو تېره اونۍ دغه اوربند ختم اعلان کړ او خپل بريدونه يې بيا شروع کړل.
په دې اړه مو اندونه