د عدلیې وزارت وایي، چې د ملا تره خېل په ښار ګوټي کې څه باندې ۲۰۰۰ جریبه ځمکه، د غصب د مخنیوي کمېسیون له خوا مشخصه شوې چې غصب شوې ده.
د عدلیې وزارت چارواکي وايي، په یوشمېر ولایتونو کې د دولتي ځمکو د غصب په اړه څېړنې روانې دي او تر دې دمه زرګونه جریبه غصب شوې ځمکې په ګوته شوې دي.
د دغه وزارت ویاند وایي، د ملاتړه خېل په ښارګوټي کې د غصب د مخنیوي او د غصب شویو ځمکو د بېرته راګرځولو کمېسیون تخنیکي ټیم د څېړنو په پایله کې دغه ځمکه مشخصه شوې ده.
د عدلیې وزارت ویاند عبدالحمید جهادیار وویل:«په دې فرمان کې ۳۴۹۷۷.۸۷ جریبه ځمکه شامله ده او له هغې ور اخوا ۲ زره او ۵۴ جریبه ځمکه نوره هم د یادې سیمې د یو شمېر غاصبینو له لوري غصب شوې ده.»
خو ملا تره خیل وایي، په دې ښارګوټي کې دولتي ځمکه نه ده غصب شوې او د دغه ښارګوټي رسمي سندونه په واک کې لري.
د ملا تره خېل ښارګوټي استازی ملا تره خېل محمدي وايي:«موږ نه غواړو چې یو متر ځمکه هم د امارت دې ولس ته راشي او ولس هم نه غواړي، چې یو متر ځمکه دولت سره پاتې شي.»
د ملا تره خېل ښارګوټي اوسېدونکی غازي تره خېل هم وویل:«موږ د خپلو ځمکو هر څه اسناد لرو، هېڅ غصب دلته نه دی شوی او موږ ډاډ ورکوو، چې دلته ځمکې نه دي غصب شوي.»
بل خوا د پلازمېنې یو شمېر اوسېدونکي وایي، ټولې غصب شوې ځمکې باید له غصب کوونکو راوګرځول شي.
د کابل اوسېدونکی پسرلی عبدیانی په دې هکله څرګندوي:«که دولتي یا شخصي ځمکې د ځورواکو او یا هر کس له لوري غصب شوې وي، نو اسلامي امارت باید دغو ځمکو ته جدي پاملرنه وکړي.»
د کابل اوسېدونکي محمد متین دانشیار هم وویل:«هر چا چې ځمکې غصب کړې وي باید بېرته د دولت ملکیت ته راوګرځول شي. موږ په دې تړاو د ترسره شوي اقدام هرکلی کوو.»
د عدلیې وزارت د اطلاعاتو پر بنسټ تراوسه په بېلابېلو ولایتونو کې ۳۰۰ زره جریبه ځمکه څېړل شوې چې له ډلې يې۲۵۰ زره جریبه غصب شوې ځمکې پيژندل شوې دي.
په دې اړه مو اندونه