په هېواد کې پر ښځو د لګول شویو محدودیتونو په تړاو د غبرګونونو په دوام، دا ځل د ملګرو ملتونو د بشري حقونو عالي کمیشنر په افغانستان کې د ښځو پر وړاندې د سرپرست حکومت د تګلارې د لغوه کېدو غوښتنه کړې.
ولکر ټرک کمېشنر په جنېوا کې د یوې غونډې کې وویل، پر ښځو محدودیتونه افغانستان د بېوزلي او نا هیلۍ لور ته بیایي.
د ملګرو ملتونو د بشري حقونو عالي کمېشنر ولکر ترک وايي: «زه به هېڅکله هم پوه نهشم چې څنګه یو حکومت کولای شي د خپل هېواد د نجونو او ښځو روحیه په دغه ډول ظلم سره تر پښو لاندې کړي، د هغوی وړتیاوې لهمنځه یوسي او خپل هېواد د فقر او ناهیلو کندې ته ورټېل وهي.»
د ښځو حقونو فعاله ثریا پیکان وايي: «په افغانستان کې د طالبانو له واکمنېدو وروسته، ښځو ښې ورځې نهدي لېدلي او له ډېرو ستونزو سره مخ شوې دي.»
خو اسلامي امارت، د ښځو پر وړاندې ممنوعیتونه کورني مسایل ګڼي او وایي، په هیواد کې د ښځو حقونه د اسلامي قوانینو پر بنسټ تامین شوي دي.
د اسلامي امارت ویاند ذبیحالله مجاهد وايي: «څه چې په شرعي قوانينو کې دي په افغانستان کې د ښځو د ازادۍ هڅې کېږي چې ورته ورکړل شي، د اسلامي امارت حکومت ښځو ته د کار او فعالیت اجازه ورکوي.»
له دې سره سم، د ملګرو ملتونو د بشري مرستو د همغږۍ مرستیاله وايي، په افغانستان کې بشري ناورین په ډېرې چټکۍ سره مخ په پراخېدو دی او د ملګرو ملتونو له لوري لګول شوي بندیزونه د دې لامل شوي چې په دغه هېواد کې ډېری بشري فعالیتونه ودرول شي.
د ملګرو ملتونو د بېړنیو مرستو د همغږۍ مرستیاله جویس مسویا وايي: «په افغانستان کې د طالبانو له واکمنېدو وروسته، پر دغه هېواد د ملګرو ملتونو له لوري لګول شوي بندیزونه د ډېریو بشرپاله فعالیتونو د درېدو لامل شوي او دا په داسې حال کې ده چې په دغه هېواد کې بشري ناورینونه په ډېرې چټکۍ سره د پراخېدو په حال کې دي.»
تر دې مخکې د امریکا بهرنیو چارو وزارت ویلي وو، که اسلامي امارت د نړۍوالو له لوري د رسمیت پېژندنې غوښتونکي واوسي؛ نو پر ښځو لګول شوي محدودیتونه باید لغوه کړي.
په دې اړه مو اندونه