په ملګرو ملتونو کې د متحده عربي اماراتو استازې د افغانستان د وضعیت په تړاو د روانې جون میاشتې په یوویشتمه د امنیت شورا د یوې بلې غونډې له جوړېدو خبر ورکوي.
لانا نسیبې په نیویارک کې د یوې خبرې غونډې پر مهال وویل، افغانستان لا هم د امنیت شورا د اجنډا په سر کې ځای لري او غړي به یې هم د افغان ښځو پر وضعیت لا ډېر تمرکز وکړي.
په ملګرو ملتونو کې د متحده عرب امارتو استازې لانا نسیبه وايي: «لکه څنګه چې تاسو یادونه وکړه، موږ به خپلو هڅو ته دوام ورکړو، څو د ملګرو ملتونو په امنیت شورا کې د افغانستان وضعیت د یوې مهمې او بنسټيزې مسالې په توګه وساتو، موږ به د افغانستان په تړاو د روان زېږدیز کال د جون میاشتې په یووېشتمه یوه غونډه وکړو.»
په ملګرو ملتونو کې د متحده عرب اماراتو استازې د خپلو خبرو په لړ کې د افغان ښځو د ملاتړ خبره کوي او وایي، د امنیت شورا غړي به د ښځو د حقونو پر مسالې تمرکز وکړي.
په ملګرو ملتونو کې د متحده عرب امارتو استازې لانا نسیبه وايي: «موږ به د افغانستان پر وضعیت په تېره بیا د افغان ښځو د حقوو پر مسالې خپل تمرکز زیات کړو او دا هغه موضوع ده چې په تړاو یې د ملګرو ملتونو د امنیت شورا د ټولو غړو دریځ څرګند دی.»
د ښځو د حقونو فعاله ثریا پیکان وايي: «دا د سرپرست حکومت دنده ده چې د ټولنې له دې انساني ځواک څخه چې ښځې دي، ګټه واخیستل شي.»
خو د اسلامي امارت ویاند د ملګرو ملتونو د امنیت شورا د غونډې د جوړېدو په غبرګون کې وايي، په ملګرو ملتونو کې د افغانستان څوکۍ باید د اسلامي امارت استازي ته وسپارل شي، څو په دغه راز غونډو کې له خپل دریځه دفاع وکړي.
د اسلامي امارت ویاند ذبیحالله مجاهد وايي: «په ملګرو ملتونو کې چې د افغانستان د خلکو څوکۍ ده، هغه دې افغانانو ته ورکړل شي او هلته دې تل له افغانانو یادونه وشي او افغانان له خپلو حقونو دفاع وکړي.»
څه باندې یوه میاشت وړاندې د ملګرو ملتونو امنیت شورا د رایو په اکثریت سره د افغانستان په تړاو یو پرېکړهلیک تصویب کړ. پهدې پرېکړهلیک کې له اسلامي امارته وغوښتل شول چې پر افغان ښځو لګول شوي محدودیتونه لرې کړي.
په دې اړه مو اندونه