د افغانستان لپاره د امریکا ځانګړي استازي توماس وېسټ په سټيمسون فکري مرکز کې ویلي چې په افغانستان کې د داعش بریدونه کم شوي او د روان زیږدیز کال له پېله تراوسه په دغه هېواد کې د داعش ډلې ۸ قومندانان وژل شوي دي.
ښاغلي وېسټ په دغې وینا کې د داعش پر ضد د سرپرست حکومت مبارزې جدي بللي؛ خو په سیمه کې د پاکستاني طالبانو د تحریک شتون یو ګواښ بللی دی.
توماس وېسټ وویل:«طالبان په افغانستان کې پر دغې ډلې یرغلیز بریدونه کوي، چې دغو بریدونو د داعش د خراسان څانګې پیاوړتیا د پام وړ راکمه کړې ده. موږ اوس هم د دغې ډلې د فعالیتونو په تړاو اندېښنه لرو خو د هغوی د ځواک او فعالیت د راکمولو په برخه کې د طالبانو هڅې بریالۍ او اغېزناکې دي.»
د افغانستان لپاره د امریکا ځانګړي استازي همدارنګه په هېواد کې دایمي ثبات ته د رسېدو لپاره ملي خبرې اترې مهمې وبللې.
هغه په دې هکله وویل:«موږ باید د افغانانو ترمنځ د خبرو او مذاکرې پېل ته لومړیتوب ورکړو، افغانان د بهرنیانو له لاسوهنې پرته کولای شي چې خپلې اړیکې مدیریت کړي، موږ هیله من وو چې دغه بهیر په افغانستان کې د امریکا له لاسوهنې پرته د یوه ټولګډونه حکومت د رامنځته کېدو لامل شي، زه فکر کوم که د طالبانو په ګډون ټول افغانان دا ګام پورته کړي، له نړۍوالې ټولنې او امریکا سره به هم د افغانستان اړیکې ښې شي.»
توماس وېسټ د خپلو خبرو په یوه برخه کې وايي، د پاکستاني طالبانو تحریک یا ټي ټي پي اوس هم د سیمې لپاره یو ګواښ دی.
خو د اسلامي امارت د ویاند مرستیال ډاډ ورکوي چې په افغانستان کې هېڅ ترهګره ډله شتون نهلري او افغان خاوره به د ګاونډیانو په ګډون د هېڅ هېواد پر ضد ونه کارول شي.
د اسلامي د ویاند مرستیال بلال کریمي څرګندوي:«هغه ډلې او عناصر چې ویجاړونکي وي، په افغان خاوره کې شتون نهلری او د افغانستان له خاورې د نورو هېوادونو پر ضد کوم زیان متوجه نهدی. هغه ډلې چې هغوی یې یادوي، په نورو هېوادونو کې دي.»
توماس وېسټ همدارنګه له افغانستانه د بهرنیو ځواکونو د وتلو په تړاو ویلي، ټولو هغو هېوادونو ته چې په افغانستان کې دخیل وو لازمه ده ترڅو هغه څه چې یې سم یا هم ناسم کړي دي، وڅېړي.
په دې اړه مو اندونه