د کورنیو چارو سرپرست وزیر د افغانستان لپاره د قطر له نوي چارسمبالي سره کتلي دي.
د کورنیو چارو وزارت په خپره شوې خبرپاڼه کې راغلي، چې د قطر چارسمبالي په دغه کتنه کې د دواړو هېوادونو ترمنځ د همکارۍ او دوو اړخیزو اړیکو پر پیاوړتیا ټینګار کړی.
په دغه کتنه کې د کورنیو چارو سرپرست وزیر سراج الدین حقاني د قطر د نوي چارسمبالي ټاکنه د دواړو هېوادونو لپاره مهمه بللې او د کابل او دوحې ترمنځ اړیکې یې ستایلې دي.
د سیاسي چارو شنونکي، ناصر شفیق و ویل: قطر په سیمه کې او د لویدیځو لپاره ډېر ښه هېواد دی. اسلامي امارت لپاره هم ډېر ښه تاریخ لري. ځکه د قطر غونډه یا نې د دوحې غونډه ددې لامل شوه چې امارت ورته اهتمام وکړي او هغوی یې هم ورته وکړي.
د سیاسي چارو یو شمېر شنونکي وايي، د دوحې او کابل ترمنځ د اړیکو پراختیا کولای شي، چې له نړۍ سره د اسلامي امارت تعامل زیات کړي.
د سیاسي چارو شنونکی، سید منصور انصاري وايي: یوازې د امن او سولې په برخو کې نه بلکې د پرمختګ په برخه کې به هم ښه رول ولوبوي. خو که قطر په دغه برخه کې هڅه وکړي او له جګړې وروسته هېواد کې د پرمختګ لپاره همکاري وکړي.
که څه هم اسلامي امارت په تر اوسه د هیڅ هېواد له لوري په رسمیت نه دی پېژندل شوی؛ خو په تېرو درې کالو کې توانېدلی، چې په ۴۰ هېوادونو کې سفارتونه او فعالې دیپلوماتیکي استازولۍ ولري.