د اسلامي امارت د رهبر د فرمان لمخې د سرپرست حکومت په کابینه کې نوي ګومارنې شوې دي.
د اسلامي امارت ویاند ذبیح الله مجاهد وایي، د دغه فرمان پر بنسټ:
- د بهرنیو چارو وزارت مخکینی مالي او اداري مرستیال، رحمت الحق فضیل د مرکزي دارالافتاء غړی
- د ټولګټو وزارت د وسپنې پټلۍ مخکینی مرستیال بخت الرحمن شرافت د عامي روغتیا وزارت مالي او اداري مرستیال
- د ۲۰۵ البدر قول اردو مخکینی قومندان محمد خان دعوت د کندوز والي
- د هلمند د ګریشک مخکینی ولسوال حیات الله مبارک د غور والي
- د غور مخکینی والي احمد شاه دین دوست د ۲۰۵ البدر قول اردو قومندان
- د عامې روغتیا وزارت مخکینی مالي او اداري مرستیال محمد اسحق صاحب زاده د ټولګټو وزارت د وسپني پټلۍ مرستیال
- د کرنې اوبو لګولو او مالدارۍ وزارت د بشري سرچینو مخکینی رییس مولوي عبدالولي اتقاني د جوزجان امنیه قومندان
- د هلمند د موسی کلا مخکینی ولسوال ملا عبدالسلام حسیني د کاپیسا امنیه قومندان
- د بادغیس د امنیه قومندانۍ د امنیت مخکینی آمر نور آقا حیدر د غور امنیه قومندان
- د ننګرهار د پوهنې مخکینی رییس عزیز الله مصطفی د ننګرهار د والي مرستیال
- د جوزجان مخکینی امنیه قومندان حفیظ الله پهلوان د باغیس د امنیه قومندانۍ د امنیت آمر او د کاپیسا مخکینی امنیه قومندان محمد عثمان د کرنې، اوبو لګولو او مالدارۍ وزارت د بشري سرچینو رییس ګومارل شوی دی.
ذبیح الله مجاهد و ویل: « دغه وروستي بدلونونه بېلابېلو برخو کې د چارو د ښه والي په موخه شوي، ځینو ولایتونو کې د خلکو غوښتنې وې او ځینو نورو ځایونو کې هم د بېلابېلو ادارو اړتیاوې وې، چې اغېزمن کسان پکې وګومارل شي.»
د سیاسي چارو ځینې شنونکي وایي، اړتیا ده چې حکومت کې ځینې مسلکي کسان هم وګومارل شي.
د سیاسي چارو شنونکي، سلیم پیگیر و ویل: « د افغانستان خلک په تمه دي، چې د اسلامي امارت د مسوولینو سربېره ځینې مسلکي کسان هم حکومت کې ځای پر ځای شي.»
د سیاسي چارو شنونکي، معین ګل څمکني و ویل: « حکومتي ادارو کې ادلون بدلون راځي، البته مشر به یې هر ځای کې چې اړین وي، همغه ځای کې ګوماري.»
تر دې وړاندې هم د روان لمریز کال د غبرګولي پر اتمه د اسلامي امارت مشر په یوه فرمان کې یو شمېر کسان سرپرست وزیران، مرستیالان او والیان ټاکلي وو