نړۍوالو رسنیو د فرانسې د ترهګرۍ ضد څارنوالانو له قوله راپور ورکړی چې، د دغه هېواد پولیسو اوس اوس، یو ۲۲ کلن افغان ځوان د داعش د ملاتړ په تور او د امریکا د ټاکنو په ورځ د یوه ترهګریز برید پلانولو کې د ښکېلتیا په تور د فرانسې په سوېل لوېدیځ کې نیولی دی.
فرانسوي رسنیو د راپور له مخې، دغه کس له خپل ۲۷ کلن ورور نصیر احمد توحیدي سره، چې تېره اوونۍ د امریکا په اوکلاهوما ایالت کې د امریکا د نومبر د پنځمې د ټاکنو په ورځ د یوه ترهګریز برید د پلانولو په تور ونیول شو، اړیکې لرلې دي.
د نړۍوالو چارو شنونکي واحد فقیري په دې هکله طلوعنیوز ته وویل:«دا د افغان ګډوالو لپاره یو ستر زیان دی او نور هېوادونه ښايي ونهغواړي چې، افغان ځوانان د کډوالو په توګه ومني.»
نیویارک پوسټ هم راپور ورکړی چې، په وروستیو کلونو کې امریکا ته د ناقانونه کډوالۍ په زیاتېدو سره، د هغو ترهګرو شکمنو کسانو شمېر زیات شوی چې، د متحده ایالتونو او مکسیکو پر پوله نیول شوي دي.
د فډرالي څېړنو ادارې د راپور له مخې، له۲۰۲۱ تر ۲۰۲۴ پورې کلونو کې د پوله ساتو ځواکونو له لوري ۳۸۲ هغه کډوال نیول شوي چې، نومونه یې د متحده ایالتونو د ترهګرۍ په نوملړ کې وو، په داسې حال کې چې، دغه شمېر له ۲۰۱۷ کاله تر ۲۰۲۰ پورې کال پورې ۱۱کسانو ته رسېده.
د کډوالو د حقونو فعال محمد خان طالبي طلوعنیوز ته وویل:«کوربه هېواد باید د نړۍوالو کنوانسیونونو په چوکاټ کې چلند وکړي.»
د سویس رسنیو هم اوس اوس راپور ورکړی، دغه هېواد دوه افغان کډوال چې، جدي مجرمان او د سویس د سولې او امنیت لپاره یې ګواښ ګڼي، له دغه هېواده شړلي دي.
دا په داسې حال کې ده چې د روان کال په جون میاشت کې هم اته تاجیکستاني وګړي له داعش سره د تړاو په شک په نیویارک، لاس انجلس او فیلادلفیا ښارونو کې نیول شوي وو.