په وروستیو ورځو کې د بشري مرستو له ځنډېدو سره هم‌مهاله، د ۵۰ بنسټونو د فعایتونو درېدو، په هېواد کې جدي اندېښنې رامنځته کړې دي.

د اقتصادي چارو ځينې شنونکي وايي که‌چېرې د مرستندویه بنسټونو فعالیتونه په دایمي توګه ودرول شوي، په هېواد کې به د بې‌زولۍ کچه پراخه شي.

دغه شنونکي همدارنګه په دې باور دي چې، د دا ډول پرېکړو دوام، په بشپړه توګه د بشري حقونو نقض دی.

د اقتصادي چارو شنونکی عبدالنصیر رښتیا په دې هکله طلوع‌نیوز ته وايي:«که‌چېرې دغه مرستې پرې شي یا کمې شي یا سیاسي شي، له شک پرته چې، د افغانستان عادي خلک زیانمنېږي، کابو درې مېلیونه ماشومان چې، پر خوارځواکۍ اخته دي، اغېزمنېږي. په ټوله ویلای شو، هغه کسان چې، دغه مرستې دروي یا سیاسي کوي، د بشري حقونو سرغړونکي شمېرل کېږي.»

 ۲۵ کلن برهان چې، له درېیو کلونو راهیسې له سمنګانه کابل ته راغلی او د پلازمېنې په کوڅو کې زړې اوسپنې پېري او پلوري، وايي د ځان او کورنۍ د لګښتونو پوره کول یې سخت شوي او زیاتوي چې، بشري مرستو ته سخته اړتیا لري.

برهان طلوع‌نیوز ته وویل:«د میاشتې پنځه زره تر ۷ زرو پيدا کوم چې، کافي نه‌دي. اوس سړی خپل لګښت نه‌شي پيدا کولی، د کورنۍ خو اصلاً ډېره ستونزمنه ده.»

خو اقتصاد وزارت په افغانستان کې د ۵۰ مرستندویه موسسو د فعالیتونو د ځنډېدو منفي اغېزو ته په نغوتې سره له نړۍوالې ټولنې غواړي چې بشري مرستې سیاسي نه‌کړي او له افغانستان سره خپلو بشري مرستو ته دوام ورکړي.

د اقتصاد وزارت مسلکي مرستیال عبداللطیف نظري څرګندوي:«هغه موسسې چې، فعالیتونه یې درېدلي، تر ډېره یې په روغتیايي، کرنې، ښوونې، ټولنیز خوندیتوب، له پېښو د مبارزې، او په ټوله کې په بشرپاله برخه کې فعالیت کاوه، اسلامي امارت له یوې د ملي وړتیاوو له لارې او له نړۍوالې ټولنې سره د اقتصادي ډیپلوماسۍ پياوړتیا له لارې، هڅه کوي چې، افغانستان له دغه بهیر مستثنا کړي.»

دا په داسې حال کې ده چې، له افغانستان سره د امریکا د مرستو له ځنډېدو وروسته، د خوړو نړۍوال پروګرام همدارنګه ویلي، د امریکا د مرستو ځنډېدلو او د نړۍوالې بودیجې کمېدو د افغانستان یو پر درېیمه برخه وګړي له سختې لوږې سره مخ کړي دي.