د اسلامي همکاریو سازمان او ترکیې له افغانانو د ملاتړ په موخه له اوسني چارواکو  سره  د خبرواترو پر دوام ټینګار کړی.

د افغانستان لپاره د اسلامي همکاریو سازمان ځانګړي استازي د ترکیې د بهرنیو چارو وزارت د سویلي اسیا له مسوول سره د افغانستان پر وضعیت خبرې وکړې.
 
د اسلامي همکاریو سازمان په خبرپاڼه کې راغلي چې دواړو خواوو د افغانانو د ملاتړ لپاره د دوامداره تعامل پر اهمیت او له اوسنیو چارواکو سره د بېلابېلو مسایلو په تړاو د رغنده خبرو پر دوام ټینګار کړی دی

د اسلامي همکاریو سازمان د خبرپاڼې یوه برخه کې راغلي: «په دې ناسته کې د افغانستان د خلکو د ملاتړ لپاره د دوامداره تعامل او د بېلابېلو مسایلو په تړاو له اوسنيو چارواکو سره د رغنده خبرو اترو پر تعقیب ټینګار وشو.
دواړو خواوو په افغانستان کې د سولې، سوکالۍ او ثبات د ګډو موخو د پرمختګ لپاره د نظرونو تبادلې ته د دوام ورکولو لپاره پر خپلې ژمتیا ټينګار وکړ.»

 د سیاسي چارو شنونکی، زلمی افغانیار په دې اړه وايي: دا د اسلامي ټولنې او د نړۍ د هېوادونو استازیتوب کوي، له همدې امله، له افغانستان سره ښه، دوامداره او مستحکمې اړیکې او د ترکیې په څېر د اسلامي هېوادونو کنفرانسونه د وضعیت د ښه والي او د افغانانو د ژغورنې لپاره مهم دي.

ترکیه هغه هېواد دی چې د اسلامي امارت تر بیا واکمنېدو وروسته یې په افغانستان کې خپل سفارت فعال ساتلی او له اسلامي امارت سره یې خپلو ډیپلوماټیکو اړیکو ته دوام ورکړی دی.
 
د اسلامي امارت د بهرنیو چارو وزارت د دویم سیاسي رییس ذاکر جلالي هم ترکیې ته په خپل سفر کې له دغه هېواد سره د دوه‌اړخیزو مسایلو د تعقیب لپاره د یوه کمېسیون د جوړېدو په تړاو د دغه هېواد له چارواکو سره خبرې کړې وې.

 د سیاسي چارو شنونکی، عزیز معارج هم وايي: د اسلامي همکاریو سازمان هېوادونه کولی شي د ترکیې په همکارۍ له افغان چارواکو سره خبرې وکړي او د هېواد ستونزې د اسلام د دین په رڼا کې حل او فصل کړي.

دا په داسې حال کې ده چې تر دې وړاندې د ترکیې د بهرنیو چارو وزارت د افغانستان او ترکیې ترمنځ سیاسي سلا مشورې مهمې بللې وې او ویلي یې وو چې ترکیه غواړي په بېلابېلو برخو کې له افغانستان سره خپلې اړیکې پراخې کړي.