افغانستان لپاره د اسلامي همکاریو سازمان ځانګړي استازي، طارق علي بخیت د جاپان بهرنیو چارو وزارت له مرستیال کامدا ماسایوکي سره له افغانانو سره د بشري مرستو او همکاریو په اړه خبرې کړې دي.
د اسلامي همکاریو سازمان په یوه خبرپاڼه کې ویلي، دواړو خواو د افغانانو لومړنیو اړتیاو ته پر رسېدو ټینګار کړی دی.
خبرپاڼه کې راغلي: «دغه ناسته کې اصلي تمرکز د افغانستان پر اوسني وضعیت و او د اسلامي همکاریو سازمان او جاپان تر منځ د بشري همکاریو د پراختیا په تړاو بحث وشو.»
د سیاسي چارو شنونکي، بلال عمر و ویل: «دا چې افغانستان د دې سازمان یو غړی هېواد دی او د نورو اسلامي هېوادونو سره پراخې ګډې ځانګړتیاوې لري، اړتیا ده چې د اسلامي امارت یو استازی د دې سازمان په غونډو کې حاضر وي، د افغانستان موضوعات مستقیم مطرح کړي او پرې بحث وشي.»
جاپان یو له هغو هېوادونو دی چې تل یې په افغانستان کې یې د بشري او اقتصادي مرستو په برخه کې فعاله ونډه اخیستې ده.
ځینې شنونکي د افغانستان د وضعیت په ښه کېدو کې د جاپان او د اسلامي همکاریو د سازمان رول اغېزناک ګڼي.
د اقتصادي چارو شنونکي، فردوس بهگزین و ویل: «جاپان د افغانستان له مهمو شریکانو دی، چې له ۲۰۰۱ کال راهیسې یې د افغانانو لپاره د پام وړ خدمتونه وړاندې کړي دي.»
تر دې وړاندې د اسلامي همکاریو سازمان ځانګړي استازي د ترکیې د بهرنیو چارو وزارت له چارواکو سره هم کتلي و او د افغانانو د ملاتړ په موخه یې د افغانستان له اوسنیو چارواکو سره د رغنده خبرو پر ملاتړ ټینګار کړی و.
په دې اړه مو اندونه