افغان حکومت نن (دوشنبې د وري په ۱۱مه) اعلان وکړ چې د طالب بندیانو د خوشې کولو بهیر یوځل بیا وځنډېد.
ټاکل شوې وه چې د طالب بندیانو د ازادېدو بهیر سبا (سې شنبې د وري په ۱۲مه) پیل شي، خو د ولسمشر د ملي امنیت د سلاکار دفتر وايي چې تېره ورځ د طالبانو او حکومت د تخنیکي ډلو ترمنځ هوکړه وشوه چې لومړی د طالبانو پلاوی کابل ته راشي چې د دغو بندیانو په اړه له نږدې خبرې وشي.
د حکومت او طالبانو د تخنیکي ډلو د هوکړې پربنسټ ټاکل شوې وه چې سبا د طالبانو سل بندیان او د حکومت شل بندیان ازاد کړل شي.
دا درېیم ځل دی چې د حکومت او طالبانو تخنیکي ډلې د بندیانو د خوشي کولو لپاره سره خبرې کوي.
د دواړو لوریو په دویم ویډیويي خبرو کې پرېکړه وشوه چې د دواړو لوریو د بندیانو د خوشي کولو بهیر د سه شنبې پر ورځ پیل شي او ټاکل شوې وه چې درې ورځې وړاندې د طالبانو یو پلاوی بګرام ته راشي چې د طالب بندیانو د پېژندنې په تړاو له افغان حکومت سره خبرې وکړي؛ خو ليدل کېږي چې هېڅ یو له دغو کارونو نه دي شوي.
د ملي امنیت د سلاکار د دفتر ویاند جاوېد فیصل وايي:«تېره ورځ په ویډیويي کنفرانس کې هوکړه وشوه چې طالبانو تخنیکي ډله د سره صلیب په مرسته او د افغانستان اسلامي جمهوري دولت په کوربتوب کابل ته واستوي چې دلته به د بندیانو په هکله بحثونه وشي.»
د بندیانو د خوشي کېدو په تړاو د حکومت او طالبانو تر منځ خبرې په داسې حال کې دوام لري چې په نیمايي هېواد کې د طالبانو له لوري ځېنې مرګونې پېښې شوې دي.
له دې ډلې د طالبانو له لوري په تخار کې د شپږو دولتي سرتېرو د وژل کېدو؛ په بغلان کې د پنځو سیمه ییزو پولیسو د وژل کېدو او د زابل په ارغنداب کې د دیارلسو دولتي سرتېرو د وژل کېدو یادونه کېدلای شي.
په افغانستان کې د پګواش بنسټ مسوول خلیل صافی څرګندوي:«د طالب بندیانو په خوشې کېدو کې ځنډ هېواد کې د تاوتریخوالي د زیاتوالی لامل دی.»
له دې ټولو سره سره هغه نوی بدلون چې په قطر کې د طالبانو په دفتر کې راغلی دی دا دی چې د طالبانو د دغه دفتر مشرتابه پرېکړه کړې ده چې د ملاداوود، ډاکټر صالح، جانګیروال، جان محمد مدني، ضیاالرحمان مدني، قاضي سید جان، محی الدین سادات او ملارسول په ګډون اته تنه ګوښه کړل شوي دي.
ازاد خبریال سمیع یوسفزی وايي:«د قطر په دفتر کې او په دغه حساس وخت کې پراخ ادلون بدلون د تعجب وړ دی، خو ضیا الرحمان مدني، جان محمد مدني او شیخ سید رسول ډېر عمر لري نو له همدې امله ګوښه کړل شول.»
پخوانی پوځي ظاهر عظيمي هم وویل:«د طالبانو په واک کې چې هر څومره د نورزایانو حضور ډېر وي په هماغه کچه نورو قومونو ته چې د طالبانو په ډله کې دي د زغم وړ نه دي.»
خو طالبانو ته نژدې سرچېنې د قطر دفتر کې دا ادلون بدلون عادي بولي.
د طالبانو پخوانی قوماندان سید اکبر اغا زیاتوي:«دا ادلون بدلون یو عادي چاره ده دا باید د خلکو د ځور لامل نه شي.»
د تاوتریخوالي کمښت، د طالب بندیانو خوشې کېدل او د افغانانو تر منځ خبرې د امریکا او طالبانو ترمنځ په هوکړه لیک کې درې هغه مهم موارد دي چې تر اوسه نه دي عملي شوي.