په کابل کې د الزهرا پر جومات د (غبرګولي په ۲۵ مه) برید کې وژل شوی، حاجي رمضان حسینزاده د هېواد سیاسي فعال او سوداګر وه.
ښاغلي حسین زاده له سیاسي اړخونو سره ښې اړیکې درلودې، خو د نوموړي پېژاند اصلي لاملونه سیاسي فعالیت، سوداګري او له خلکو سره د هغه مرسته ښودل کېږي.
د حسینزاده ملګری، محمد سرور وايي:«ښه سړی وه، سړهسواند وه خلکو ته، نه یوازې هرازه خلکو ته بلکې نوروخلکو ته هم.»
د نوموړي زوی، حاجي احمد څرګندوي:«ټوله ورځ د خلکو په سوچ کې وه، د موټر لرونکو، کراچۍ لرونکو او ټولو خلکو په درد یې خوړو.»
په همدې حال کې د ملي یووالي حکومت اجرائیه رئيس، عبدالله عبدالله له یو شمېر سیاسي مشرانو سره د ښاغلي حسینزاده کور ته ورغلي او د نوموړي کورنۍ ته د ډاډ ګېرنې ترڅنګ دا برید غندلی دی.
د سولې عالي شورا مشر، کریم خلیلي هم د ښاغلي حسینزاده له کورنۍ لیدنه کړې.
د روژې میاشتې پیل راهیسې دا درېیم برید دی چې پر لمونځکوونکو ترسره کېږي.