د بریټانیې حکومت په یوې خبرپاڼه کې چې د پنجشنبې په ورځ خپره شوې ویلي چې سېرنېکولاس یې په افغانستان کې د دغه سفارت د نوي سفیر په توګه په دنده ګمارلی دی.
ښاغلی نېکولاس دمګړۍ د افریقا په شاخ سیمه کې برېټانیې سفیر دی.
د افریقا شاخ سیمه د اریټریا، جیبوټیا، سومالیا او اټیوپیا هېوادونه په ځان کې رانغاړي.
هغه له دې وړاندې په سوډان، د کانګو په دیموکراتیکې جمهوري، کې د بریټانیې د سفیر او د افغانستان په سوېل کې د بریټانیې د همغږي کوونکي او په اسپانیا کې د سفیر د مرستیال په توګه دندې ترسره کړې دي.
په افغانستان کې د انګستان اوسنی سفیر ښاغلی ډامنیک جرمي دی چې له یوه کال راهیسې دنده ترسره کوي.
ښاغلی نېکولاس به د اګسټ په میاشت کې په افغانستان کې کار پیل کړي.