د ملي دفاع وزارت نن(یکشنبې د کب۲۰مه) وايي چې د تېرو څلورویشتو ساعتونو په موده کې افغان ځواکونو د هوايي او ځمکنیو پوځي عملیاتو کې ۲۲ ترهګر وژلي دي.
دا عملیات د هېواد په بېلابيلو سیمو کې ترسره شوي دي.
دا وزارت وايي چې په وژل شویو ترهګرو کې د داعش ډلې وسلهوال هم شامل دي.
افغان ځواکونو د لغمان ولایت مرکز بسرام سیمه کې شپږ وسلهوال وژلي دي.
د ملي دفاع وزارت وايي چې افغان ځواکونو د هوايي او ځمکنیو پوځي عملیاتو په ترڅ کې چې د ننګرهار ولایت په نازیانو او کامې ولسوالیو کې ترسره شوي دي د داعش ډلې ۶ غړي وژلي او یو شکمن کس یې نیولی دی.
په همدې حال کې د ملي دفاع وزارت په هلمند ولایت کې هم د ملي اردو پوځي عملیاتو خبر ورکوي.
دا وزارت وايي چې د یاد ولایت په نهرسراج، نادعلي او واشېر ولسواليو کې کابو ۱۰ وسلهوال وژل شوي او څلور نور ټپيان دي.
په دې عملیاتو کې د وسلهوالو یو شمېر وسلې او مهمات هم د افغان ځواکونو لخوا له منځه وړل شوي دي.
د افغان ځواکونو مرګ ژوبلې په اړه څه نه دي ویل شوي.