د ګلبدین حکمتیار په مشرۍ جزب اسلامي په امنیتي بنسټونو کې د خپلو ۳ زره او ۵۰۰ افسرانو نوملړ جوړ کړی دی.
د حزب اسلامي سیاسي شورا وايي په لومړي پراو کې دوی د سلو کسانو نوملړ د سولې د هوکړهلیک ګډ کمېسیون ته سپارل شوی دی.
کریم امین وايي چې د حزب اسلامي څه باندې پنځوس افسران د ډګروالۍ ، برید جنرالۍ او تر هغې لوړې رتبې لري.
د هوکړې د عملي کېدو کمېسیون غړي وايي په لومړي سر کې به ۸۰ تنه افسران د ګمارنې په موخه ملي دفاع وزارت ته وپېژندل شي.
د افغان حکومت او د ګلبدین حکمتیار حزب اسلامي ترمنځ د سولې د هوکړې په بنسټ، د حزب اسلامي ټول هغه غړي چې د کار په شرایطو برابر دي او په دولتي بنسټونو کې د کار کولو لپاره لېوالتیا لري په دغو بنسټونو کې به جذب شي.
دې ګوند تر اوسه د خپلو ۳ زره او ۵۰۰ صاحب منصبو نوملړ جوړ کړی، او د دوی لومړی ډله د سولې د هوکړې د اجرايي کېدو ګډ کمېسیون ته استول شوې ده.
د افغانستان د حزب اسلامي د سیاسي شورا غړي امین کریم څرګنده کړه:«نیمايي پوځي صاحب منصبان چې د لومړیو سلو تنو په چوکاټ کې معرفي شوي دي، د ډګروالۍ، برید جنرالۍ او له هغې لوړې رتبې لري.له هغې پرته ډېر شمېر جنرالان دي چې هم د نظام له معمولي بهیر له پلوه د دغو رتبو څېښتن شوي او هم د حکمتیار له خوا په وړیاتي توګه چې کله د هېواد لومړی وزیر وه هغوی ته ورکړل شوي دي.»
خو د سولې د هوکړې د پلي کېدو کمېسیون وايي چې د دغه ګوند په لومړي نوملړ کې ۸۰ تنه شامل دي او اوس د هغوی مخینه د څېړنې په حال کې ده.
د سولې د پلي کېدو کمېسیون ویاند حامد فرزان په دې اړه وايي:«۱۰ ورځې وړاندې د حزب اسلامي له خوا مو لومړنی نوملړ ترلاسه کړ چې ۸۰ تنه په کې شامل دي او ۲۰ – ۲۳ کاله پخوا یې په ملي دفاع وزارت کې یې کار کړی دی.»
ملي دفاع وزارت د دغو افسرانو ګمارل د دولت په مشرتابه پورې اړوند بولي.
د ملي دفاع وزارت ویاند دولت وزیري په دې اړه څرګنده کړه:«د سرباز،افس او له هغه څخه په لوړو پوستونو کې د شاملېدو لپاره اصول شته، هغوی هم افغان دي او کولای شي په دغو ځواکونو کې شامل شي، په دې شرط چې د دغه پالیسۍ سره برابر وي.»
د ولسي جرګې استازي د دې ګوند د افسرانو د ګمارلو په اړه داسې ايي.
د ولسي جرګې غړې فوزیه کوفي وايي:«افغان حکومت باید له دوی وسلې واخلي او خپلې وسلې په ځمکه کېږي چې موږ ډاډه شو چې په واقعیت کې موږ یوې ټولنیزې سولې ته رسېدلي یوو کهچېرې غواړي له هغوی څخه د سولې د ټینګښت په بهیر کې استفاده وشي، د امنیتي ځواکونو په لیکو کې دې تنظیم کړي.»
د اساسي قانون په بنسټ هغه سیاسي ګوندونه چې په هېواد کې فعالیت لري باید پوځي فعالیت ونهلري، حزب اسلامي له دولت سره په هوکړه کې ژمنه کړې چې خپل پوځي تشکیل به منحل کړي خو تراوسه د دې ګوند د پوځیانو کره شمېره څرګنده نه ده.