د ولسمشر لومړی مرستیال جنرال عبدالرشید دوستم چې د جوزجان ولایت د قوش تپې ولسوالۍ د عملیاتو مشري کوي وايي چې جګړه د حل لاره نه ده او طالبان د پردیو له هرډول مرستې سره نهشي کولای چې په افغانستان کې د اسلامي امارت حکومت رامنځته کړي.
جنرال دوستم وویل: "جګړه د حل لاره نه ده طالبان له دغې جګړې سره چې له بهر او دننه څخه له هر ډول مرستې سره نه شي کولای یو امارتي حکومت رامنځته کړي".
هغه د ترهګرو له ټولو ملاتړو هېوادونو څخه غواړي چې له دغه کار څخه لاس په سر شي.
ښاغلی دوستم وايي چې طالبان د پیسو لپاره جنګېږي او حاضر دي کهچېرې دغه ډله له جګړې څخه لاس په سر شي هغوی ته د پاکستان د پوځي استخباراتو څخه لس برابره زیاتې پیسې ورکوي.
په همدې حال کې د قوش تپې ولسوالۍ ډېری برخې د مخالفو وسلهوالو له شتون څخه پاکې شوې دي.
د دغو عملیاتو مشري د ولسمشر لومړی مرستیال پرغاړه لري.
د دولت مخالفو وسله والو په دغو سیمو کې امن ځایونه لرل او ټولې لارې د افغان ځواکونو پرمخ تړلې وې.
یو تن سرتېري وویل: "درې ځله موږ ملاتړ وکړ خو موږ ونه توانېدو چې له دغه ځای څخه تېر شو دمګړۍ مرسیتال صاحب حضور لري د خدای او د مرستیال صاحب په مرسته ډېر پرمختګونه لرو".
بل سرتېري زیاته کړه: "۱۹ ورځې موږ دلته مقاومت وکړ د الله په فضل موږ مرګ ژوبله نه لرله خو طالبان ته مو درنه مرګ ژوبله اړولې ده".
دا کسان د افغان ځواکونو هرکلي ته راوتلي او د طالبانو له کړنو شکایت لري.
د قوش تپې اوسېدونکي مؤمن په دې اړه وویل: "طالبانو له موږ څخه عشر او زکات اخیسته او خلک به یې ځورول او وهل ټکول".
طالبان له سیمې تښتېدلي او افغان ځواکونو د طالبانو له مقاومت پرته دا سیمې نیولې دي.
د دولت مخالف وسله وال په اوسني وخت کې د قوش تپې له ستراتېژیکو سیمو ایستل شوي او د دې ولسوالۍ لارې پرانیستل شوې دي.
په دې اړه مو اندونه