په افغانستان کې د امریکا متحده ایالاتو پراختیايي بنسټ د دوشنبې په ورځ (د سلواغې په ۲۸مه) ویلي چې ۲۶ افغان صادر کوونکو خپل صادراتي توکي لکه وچې مېوې، د مېوو اوبه، زعفران او مسالې د «دوبۍ ګلفوډ» نندارتون کې د څلورو ورځو لپاره نندارې ته اېښي دي.
دغه نندارتون تېره ورځ جوړ شو او ټاکل شوې چې د څلورو ورځو لپاره دوام وکړي.
په افغانستان کې د امریکا متحده ایالاتو د پراختیايي رییس پپټر ناټیالو په دې اړه وايي:«په داشان مهمو صادراتي بازارونو کې د افغانستان د محصولاتو د پلور زیاتوالي د بزګرو کورنیو عاید زیات کړی دی. افغان ښځو او سړیو ته یې کاري فرصتونه رامنځته کړي دي او همدارنګه د افغان حکومت عواید یې زیاتوي.»
هغه زیاته کړه:«د امریکا حکومت ژمن دی چې د دغه بنسټ له لارې سولې او سوکالۍ ته د رسېدو لپاره د افغانستان له خلکو ملاتړ وکړي.»
په دغه نندارتون کې د افغان مېرمنو محصولاتو هم نندارې ته وړاندې کړل شول.
د ګلفوډ نندارتون، د ۴۲۰۰ تنو چې خپل محصولات نندارې ته اېږدي او د نړۍ له ۱۵۲ هېوادونو څخه د څه باندې ۹۸۰۰۰ ننداره چیانو د کوربتوب وړتیا لري.