د بدخشان د نسي ولسوال ابراهیم قیومي ګواښ کړی چې شونې ده چې طالبان دا ولسوالۍ وپرځوي.
ښاغلي قیومي طلوع نیوز ته ویلي، طالبانو له یوې میاشتې راهیسې نسي ولسوالۍ کې فعالیتونه زیات کړي او اوس یوازې د ولسوالۍ مرکز له امنیتي ځواکونو سره دی.
نوموړی خبرداری ورکوي که د هوا له لارې درانه تجهیزات او تازه دمي سرتېري ور وانه ستول شي، نو پر نسي سربېره به څلور ولسوالۍ نورې هم د سقوط تر ګواښ لاندې راشي.
ولسوال وايي، نسي له مایمي، شیکي، کوف آب او خواهان ولسوالۍ سره تړلې سیمه ده چې تر منځ یې یوازینی نښلوونکی پل په نسي ولسوالۍ کې دی چې له تاجکستان سره ۵۰۰ کیلومټره ګډه پوله لري او له همدې لارې اکمالات کېږي.