د برېښنا شرکت وايي چې د برېښنا د ستنو د ویجاړولو په لړ کې، تېره شپه د کابل ښار په احمدشاه بابا سیمه کې د برېښنا یوې بلې ستنې ته هم چاودنه ورکړل شوه.
دا د برېښنا پنځمه ستن ده چې په کابو دوو اوونیو په لړ کې ورته چاودنه ورکړل شوې او ویجاړه شوې ده.
د تېرې شپې په چاودنه کې د پولیسو درې تنه ځواکونه هم ټپيان شوي دي.
له دې مخکې هم په کابل او پروان ولایتونو کې د برېښنا څلور ستنو ته چاودنه ورکړل شوې ده. په دغو چاودنو کې د برېښنا شرکت یو کارکوونکی وژل شوی او کابو لس تنه نور کارکوونکي یې ټپيان شوي دي.
د کورنیو چارو وزارت ویاند طارق ارین په دې اړه وویل:«موږ اته تنه نیولي دي. زموږ عملیات دوام لري چې د دوی شبکه پيدا کړو او لومړنۍ ډله مو چې نیولې ده دوی له مخالفو وسله والو سره اړیکه لري.»
خو تراوسه چا د دغو ستنو د ویجاړولو مسوولیت نه دی منلی.
هغه ستنه چې تېره شپه ورته چاودنه ورکړل شوه د کابل ښار د احمد شاه بابا په سیمه کې موقعیت لري او له نغلو بند څخه کابل ته برېښنا لېږدوي.
د برېښنا شرکت مسلکي ډلې له نن سهار راهیسې د دغې ستنې پر بیارغونې کار پيل کړی دی.
د برېښنا شرکت یو له دغو مسلکي کارکوونکو عنایت الله وویل:«زموږ یوه ډله دلته کار کوي... ډېر ژر به یې کار خلاص شي.»
په دې اړه مو اندونه