د سمنګان ولایت ملي امینت ریاست ودانۍ مخې ته چاودنه شوې ده.
د والي ویاند، محمدصدیق عزيزي وايي چاودنه نن له غرمې مخکې (دوشنبې د چنګاښ په ۲۳مه نېټه) شاوخوا یوولس بجې شوې ده.
هغه د پېښې څرنګوالي په تړاو وايي:«تر اوسه دا نه ده څرګنده چې چاودنه د موټر بم یا هم د ځای پر ځای شوي ماین له کبله رامنځته شوې ده.»
د سمنګانو سیمه ییز چارواکي وايي، د دغه ولایت ملي امنیت ریاست برید کې ۱۰ کسانو ژوند له لاسه ورکړی او له پنځوسو زیات ټپیان دي.
ښاغلی عزیزي زیاتوي چې سیمه کې د ډزو غږ هم اورېدل شوی دی.
په همدې حال کې د سمنګان ولایت د عامې روغتیا رییس، عبدالخلیل مصدق څرګندوي چې تر اوسه د دریوو ماشومانو او یوې ښځې په ګډون ۴۳ ټپيان روغتون ته لېږدول شوي دي.
د پېښې شاهدان وايي چې برید د موټر بم په مرسته ترسره شوی دی.
طالبانو د برید مسوولیت منلی.