د پکیتا د والي مرستیال عبدالولي سهي د شنبې په ورځ ویلي دي چې د دغه ولایت د جاني خېلو ولسوالۍ تېره شپه د طالبانو لاسته ورغله.
د سهي په وینا دغه ولسوالۍ د پاکستان د استخباراتي سازمان په مرسته پرځېدلې ده.
هغه ویلي دي چې د جګړې په ډګر کې د پاکستاني بلواګرو مړي لیدل کېږي.
ښاغلی سهي په دغې ولسوالۍ کې د هوايي بریدونو د نه ترسره کولو له امله پر حکومت سخته نیوکه کوي.
له دې وړاندې د جاني خېلو ولسوال عبدالرحمان سولهمل ټينګار کړی وه چې د دغې ولسوالۍ اداره چې کابو د یو زره او ۲۰۰ مخالفو وسلهوالو له برید څخه وروسته د طالبانو لاسته ورغلې ده.
د جاني خېلو ولسوال وايي چې د مرستندویه ځواکونو او د ډېرو تجهیزانو نه رسېدو له امله،مخالفو وسلهوالو د جاني خېلو اداره یې تر لاسه کړه او د دواړو خواوو د جکړې په پایله کې ۳۰ امنیتي ځواکونه ووژل شول.
سولهمل ویلي دي چې د دغې ولسوالۍ له پرځېدو څخه وروسته طالبانو د ولسوالۍ ودانۍ او د هغو کسانو کورنه چې له دولت سره یې کار کاوه او د ولسي ځواکونو کورونو ته یې اور ورته کړی دی.
ویل کېږي چې د دغې ولسوالۍ ډېری اوسېدونکي تښتېدلي دي.
ښاغلی سولهمل هم د دغې ولسوالۍ په جګړه کې د پاکستاني بلواګرو حضور تأییدوي.
په همدې حال کې سولهمل ویلي چې دولت تراوسه د ټپيانو د لېږد لپاره هېڅ اقدام نه دی کړی.
تراوسه د ولسي وګړو د مرګ ژوبلې په اړه کره مالومات په واک کې نه شته.
د جاني خېلو ولسوالۍ له څو اوونیو راهیسې څو ځله د مخالفو وسلهوالو په کلابندۍ کې وه.
په دې اړه مو اندونه