د پاکستان د بهرنیو چارو وزیر شاه محمود قریشي له کابل او تهران وروسته بېجنګ ته ورسېد، ښاغلی قریشي په دغه سفر کې د افغانستان په وضعیت کې د نوي بدلون په اړه د پاکستان او چین ترمنځ هوکړه شوې ده.
د پاکستان د بهرنیو چارو وزیر شاه محمود قریشي په دې اړه وویل:«د چین د بهرنیو چارو له وزیر سره مو ښه ناسته لرله، په دغه کتنه کې مو د افغانستان د وضعیت او په ابوظبي کې د وروستیو خبرو او نورو دوه اړخیزو مسلو په اړه خبرې اترې وکړې.»
د چین د بهرنیو چارو وزارت د شاه محمود قریشي او وانګ یي ترمنځ د هوکړې جزییات نه بربنډوي خو ټینګار کوي چې دواړو لوریو د افغانستان د وضعیت د نویو بدلونونو په هکله یو لړ هوکړې کړې دي.
د چین د بهرنیو چارو وزارت ویاند هووا چونینګ څرګنده کړه:« دواړو لوریو د افغانستان د وضعیت د نویو بدلونونو په اړه ژور بحث درلود او جامع هوکړې ته ورسېدل، چین او پاکستان باور لري چې له پوځي لارو د افغانستان ستونزه نهشي هوارېدای او سیاسي پخلاینه یوازینۍ لار ده.»
له بلخوا د حزب اسلامي مشر ګلبدین حکمتیار په افغانستان کې د جګړې د پای ته رسولو لپاره د پاکستان هڅې صادقانه بولي.
د حزب اسلامي مشر ګلبدین حکمتیار په دې اړه وویل:«پاکستان د هر بل هېواد په پرتله له جګړې ډېر زیان لیدلی، له دغې جګړې چې یوه ګاونډي هېواد ته ډېر زیان رسېدلی هغه پاکستان دی او زه دمګړۍ د پاکستان په سیاستونو کې بدلون وینم او زه باور لرم چې دوی اوس غواړي چې جګړه پای ته ورسوي.»
په دې لړ کې د کورنیو چارو وزارت خبرداری ورکوي هغه کسان چې جګړې ته دوام ورکړي وبه ځپل شي.
د کورنیو چارو وزارت ویاند نجیب دانش وايي:«موږ له هر هغه سولهییز حرکت څخه چې د افغانانو په مالکیت وي ملاتړ کوو، خو هغه کسان چې دغه بهیر ته لبیک نه وايي او د جګړې په مورچلو کې د افغانستان له خلکو سره جنګېږي له ټول وس سره د هغوی په وړاندې جنګېږو او د هغوی د ځپلو لپاره چمتو یوو.»
چین د پاکستان یو نږدې متحد هېواد دی او له اسلام اباد سره ډېرې اقتصادي اړیکې لري، کارپوهان وايي پر اسلام اباد د بېجنګ نفوذ د افغانستان د سولې له بهیر سره د مرستې لپاره ډېر مهم دی.
د پاکستان د بهرنیو چارو وزیر به له طالبانو سره د سولې په هکله د خبرو لپاره مسکو ته هم ولاړ شي.