په پکتیا کې امنیتي چارواکي وايي چې امنیتي ځواکونو،د دغه ولایت د جانيخېلو ولسوالۍ نن ګهیځ (جمعه د زمري ۱۳ مه) له طالبانو څخه بېرته ونیوله.
په پکتیا کې د تندر قول اردو قومندان وايي چې جاني خېلو ته د کمانډو ځواکونو په رسېدو سره طالبان یې له دغې ولسوالۍ په شا وتمبول.
هغه زیاته کړه چې تېره ورځ د جاني خېلو ولسوالۍ د نیولو لپاره د هوا او ځمکې له لارې عملیات پیل شوي وو.
د پکتیا جانيخېلو ولسوالۍ، تېره اوونۍ د طالبانو د یوه برید په ترڅ کې د دوی لاسته ولوېده.له دې سره په ورته وخت کې، دغه ولسوالۍ، په غور کې د«تیورې» په فاریاب کې «کوهستان» ولسوالۍ هم د طالبانو له خوا پرځول شوې وې. خو له دې وړاندې امنیتي ځواکونو دغه دوه ولسوالۍ یې له طالبانو څخه بېرته ونیولې.
دا په داسې حال کې ده چې د طالبانو ویاند ذبیح الله مجاهد په خپل ټوېټر پاڼه کې، د جانيخېلو ولسوالۍ بېرته نیول رد کړي دي.