هغه سندونه چې طلوع نیوز ته رسېدلي دي د دې ښودنه کوي چې په ځينو ولایتونو کې د بایومېټریک شویو رایو پایلې د رای پاڼو له پایلو سره توپير لري.
دغه سندونه چې د زابل، کندهار، دایکندي، هلمند او هرات ولایتونو دي لیدل کېږي چې د رایو شمېر د پاڼو په پایلو کې د هغو رایه ورکوونکو څو برابره دی چې په بایومېټریک دستګاوو کې ثبت شوي دي.
د بېلګې په توګه په یوه دغه سند کې لیدل کېږي چې هلمند ولایت کې د رایې ورکړې په یوه محل کې، ۹ رایه ورکوونکي په بایومېټریک دستګاه کې ثبت شوي، خو د دغه محل د پایلو په پاڼه کې، ۴۱۱ رایې ثبت شوې دي.
د دغو سندونو پر بنسټ، د رایې ورکړې په دغه محل کې، د ۳۶۶رایې ورکوونکو نومونه ثبت شوي، خو په صندوق کې ۴۲۰ رایې اچول شوې دي.
ځینې ټاکنیزې ډلې، په ټاکنو کې د درغلۍ په اړه له اندېښنې سره ټینګار کوي چې باید تقلبي او واقعي رایې په رڼه توګه سره جلا شي.
د ډاکټر عبدالله په مشرۍ د ثبات او همپالنې د ډلې غړی نور رحمان اخلاقي څرګنده کړه:«هغه څه چې له قانون او کړنلارو را وځي او کمېسیون د هغه پر تطبیق مکلف دی، باید روڼتیا تامین شي.»
له دې سره هممهاله د ټاکنو په خپلواک کمېسیون کې یو شمېر څارونکي وایي چې له درېیو روځو راهیسې بایومېټریکي مالومات په مرکزي بانک کې نه دي ثبت شوي او په مالوماتي بانک کې یوازې د پایلو د پاڼو مالومات ثبت کېږي.
د ټاکنو یو له څارونکو محمد یونس نواندیش وايي:«دوی د بایومېټریک ډېټاګانو لېږد درولی، په داسې حال کې هوکړه شوې او دا د کمېسیون پرېکنده پرېکړه ده او همدارنګه ټولو څارونکو په دې هوکړه کړې او نړیوالې ټولنې هم په دې هوکړه کړې ده.»
خو د ټاکنو خپلواک کمېسیون وایي چې یوازې بایومېټریک شوې رایې اعتبار لري.
د ټاکنو د خپلواک کمېسیون کمېشنر محمد عبدالله وویل:«زموږ لپاره یوازې هغه رایې چې د بایومېتریک له لارې پړاوونه کچ کړي وي اعتبار لري او هغه د چاڼ وړ هم دي کهچېرې کومه سرغړونه شوې وي.»
خو تراوسه خبریالانو د دې اجازه نه ده ترلاسه کړې څو د انتخاباتو له مالوماتي بانک څخه لیدنه وکړي. نن هم بریالي نه شو چې د دغه بانک ځای ته ننوځو او په دغه بانک کې د مالوماتو د ثبت څرنګوالی انځور کړو.