روسیه د افغانستان د سولې په اړه د سیمهييزو هېوادونو د کوربه توب موخه،د افغانستان اوسنیو ستونزو ته د حل لارې لپاره د تګلارې لټون بولي.
په کابل کې د روسیې سفیر ټینګار کوي چې د افغانستان اوسنۍ ستونزه پوځي حل لاره نه لري او د ۱۲ سیمهییزو هېوادونو استازي د مسکو په دریمه غونډه کې،افغان حکومت او طالبان مخامخ خبرو اترو ته هڅوي.
په کابل کې د روسیې سفیر الکسانډر مانټیټسکي وویل:«څو علتونه شته چې باید د افغانستان په ستونزې په سیمهيیزه توګه بحث وشي او د طالبانو تحریک ته پیاوړی پیغام واوستول شي چې د افغانستان ستونزه پوځي حل لاره نه لري.»
دا روسی دیپلومات ټینګار کوي چې په دې غونډه کې طالبانو ته بلنه نه ده ورکول شوې.
هغه زیاته کړه:« په دې غونډه کې طالبانو ته هېڅ بلنه نه ده ورکول شوې، یوازې د حکومتونو استازي پهکې ګډون کوي.»
په همدې حال کې د ناټو سرمنشي ټینګار کوي چې په افغانستان کې د سولې هر بهیر باید د افغانانو لخوا ترسره شي.
د ناټو سرمنشي ینس سټولټنبرګ په دې اړه څرګنده کړه:«موږ له سولې او ملي روغې جوړې ملاتړ کوو خو دا بهیر باید د افغانانو په مشرۍ وي او په خپله د افغانانو لخوا په مخ یوړل شي. موږ د سولهيیزې حل لارې او له تاوتریخوالیو پرته حل لارې پیدا کېدو څخه ملاتړ کوو خو دا بهیر باید د افغانانو لخوا رهبري شي، دا د ناټو اصلي پیغام دی.»
روسیه ولې له افغانستان سره ډېره لېوالتیا لري؟
د ولسي جرګې غړي فرهاد مجیدي څرګنده کړه:«د ځواکمنو هېوادونو دغه ناسالمه سیالۍ افغانستان یې د د ناعادلانه جګړو په میدان بدل کړی چې په پایله کې یې د افغانستان خلک دي چې قرباني کېږي او وینه یې تویېږي.»
د کابل پوهنتون استاد نصرالله ستانکزي هم څرګنده کړه:«ظاهراً د سولې د پروسې تر نامه لاندې خو زما باور دا دی،چې هر څومره لوبغاړي په ځانګړې توګه نه لمسېدونکي توګه په افغانستان کې لاسوهنه وکړي،د افغانستان پېښه پېچلې به شي او دا د روسانو په ګټه هم نه ده او له بده مرغه په هېواد کې بې ثباتي به زیاته کړي.»
په دې لړ کې د امریکامتحده ایالاتونو پوځ یوځل بیا له طالبانو سره د روسیې د احتمالي مرستو په اړه اندېښنه څرګنده کړې ده.
د امریکامتحده ایالاتونو د پوځ مرکزي قوماندان وايي چې روسیه له طالبانو په ملاتړ هڅه کوي چې په افغانستان کې نفوذ لرونکی لوری وي.