د ناټو لوی منشي، ینس سټولټنبرګ د تېره ورځ( د سلواغې ۲۴مه) په بروکسل کې د ناټو غړو هېوادونو د وزیرانو په ناسته کې ویلي چې افغانستان او ملګرو یې د سیمهييزو ځواکونو پیاوړتیا ارزښت له ترهګرۍ سره په مبارزه کې لیدلی دی.
ښاغلي سټولټنبرګ زیاته کړې:«په افغانستان کې د کلونو کلونو تجربې موږ ته وښودله چې په دې هېواد کې له ترهګرۍ سره مبارزې غوره لاره دسیمهییزو پولیسو پیاوړي کول دي.»
نوموړی څرګنده کړې ده چې سږ کال به ناټو افغانستان کې د خپلو ځواکونو شمېر ۱۶ زرو ورسوي او په دې هېواد کې د ناټو ځواکونو شمېر دزیاتېدو په حال کې دی.
ناټو مخکې ژمنه کړې وه چې په افغانستان کې به د خپلو شته ځواکونو پر شمېر درې زره نور هم زیات کړي.
سټولټنبرګ همداراز زیاته کړې ده چې د ناټو غړي ډېر شمېر هېوادونه به د ناخالص تولید څخه دوه سلنه په ۲۰۲۴ زیږدیز کال کې د خپلې دفاع لپاره ولګوي.
د شمېرو له مخې د ناټو غړو ۲۹ هېوادونو له ډلې ۱۵ یې موخې ته رسېدلي او د اروپا او نورو سیمو دفاع لپاره به خپله بودجه زیاته کړي.