د غور د پولیسو ویاند، عبدالمعروف رامش د طالبانو په برید کې د څلورو سیمه ییزو پاڅون کوونکو له وژل کېدو خبر ورکوي.
ښاغلی رامش، نن(سې شنبې د غويي به ۲۳مه نېټه) څرګندوي چې پېښه د غور مرکز، فیروز کوه ښار کې شوې او درې نور سرتېري ټپيان شوي دي.
د غور د والي ویاند وايي چې طالبانو د فیروز کوع ښار لویدیځ په څلویښت کیلومترۍ کې د افغان ځواکونو پر پوستې برید کړی وو او نښتې څو ساعته دوام درلود.
هغه وايي چې نښته کې طالبانو ته هم مرګ ژوبله اوښتې ده، خو کره شمېر یې نه دی څرګند.
طالبانو په دې تړاو څه نه دي ویلي.
په همدې حال کې د پروان د والي ویانده، وحیده شهکار دغه ولایت کې د دریوو پولیسو له وژل کېدو خبر ورکوي.
نوموړي وايي چې دا پولیس دریوو بېلابيلو برخو کې وژل شوي، او په ځوابي برید کې دوه تنه بریدګر ټپیان شوي دي، خو تر اوسه نه ده څرګنده چې پولیس سرتېري کومې ډلې لخوا وژل شوي دي.