دوو افغان تکواندوکارانو عربي متحده اماراتو په فجیره اوپن تکواندو سیالیو کې د سپینو زرو مډالونه ترلاسه کړل.
دغو لوبو کې فرزاد منصوري او محسن رضايي دواړو په ترتیب سره په ۶۸ او ۵۸ کیلو ګرام وزن کې خپلو ۴ سیالانو ته ماته ورکړه او دغه ارزښتناکه مډالونه یې ترلاسه کړل.
دا په داسې حال کې ده چې افغان لوبغاړو تېرو کالو کې هم په دغو لوبو کې ګډون کړی وو، خو کوم مډال یې نه وو ترلاسه کړی.
دغو سیالیو کې د دوو ښځینه په ګډون ۶ لوبغاړو برخه اخیستې وه.
سیالیو کې حسین لطفي، حکمت الله، سمیه غلامي او زهرا میرزایي هم لاسته راوړنې درلودې، خو کوم مډال ته ونه رسېدل.
د فجیره اوپن سیالیو کې له ۴۰ هېوادونو کابو۲۲۰۰ تکواندوکارانو ګډون ګډون کړی وو او دغه سیالۍ د افغان لوبغاړو په ځلېدو سره تېره شپه(د سلواغې په ۱۳مه) پای ته ورسیدې.