په افغانستان کې د بهرنیو ځواکونو عمومي قومندان جنرال جان نېکلسن له طلوع نیوز سره په یوې ځانګړې مرکه کې وايي چې امریکا پوهېږي چې د افغان طالبانو مشران د پاکستان په کوټې او پېښور کې دي.
ښاغلی نېکلسن وايي:« تاسې پوهېږئ، چې موږ هغوی ته د کوټې شورا او د پېښور شورا وایو. دا شوراګانې د پاکستان د ښارونو په نوم دي. موږ پوهېږو، چې د افغان طالبانو مشران دغو برخو کې دي. تېر کال مو د مې په میاشت کې، د طالبانو مشر ملا منصور پاکستان کې وواژه»
هغه وايي چې د بهرنیو پټنځایونو له موضوع سره باید جدي چلند وشي.
د دې په اړه چې له دغو پټنځایونو سره څه ډول چلند وشي ښاغلی نېکلسن وویل:«د امریکا او پاکستان دولتونه په دې اړه ځانګړی بحث ترسره کوي. خو له دغو پټنځایونو سره جدي چلند وشي. او له افغانستان څخه بهر له ترهګرو څخه ملاتړ کم او ودرول شي.»
د دې پوښتنې په ځواک کې چې دغه کار له پوځي لارې به ترسره شي یا ډیپلماټیکې، هغه وویل چې دا یوه دوه اړخیزه حکومتي کړنلارې ته اړتیا لري.
هغه زیاته کړه:«له شک څخه پرته، ډيپلماټیکې هڅې به په کار وي، نه یوازې د امریکا له لورې، بلکې زموږ د متحدو هېوادونو له خوا چې په افغانستان کې ځواک لري.»
دا امریکایی جنرال وايي، ماموریت یې دادی چې پر طالبانو فشار راوړي او بهرني ځواکونو د یوې سولهییزې لارې پلوي دي، خو دی ټینګار کوي، چې طالبان به له نظامي لارې نه په ګټنې بریالي نه شي.
د بهرنیو ځواکونو عمومي قومندان څرګنده کړه:« موږ هیله لرو، طالبان دې درک ته ورسېږي، چې د سولې خبرې پیل کړي. تر هغه مهاله به، موږ په کور دننه او بهر پر هغوی او پټنځایونو یې فشارونه زیات کړو.»
جنرال نیکلسن، د امریکا د نوې تګلارې ښې پایلې ته هیله من دی او وايي، چې دا تګلاره، په بهر کې د ترهګرو د پټنځایونو موضوع هم رانغاړي، او دا تګلاره به، امریکایي ځواکونو ته، د ترهګرۍ پر وړاندې مبارزه کې لا زیاته ځواکمنتیا ورکړي.