ولسمشر، اشرف غني د ننګرهار ولایت د هسکې مېنې اړوند د جودرې سیمې پر جامع جومات د وروستي ترهګریز برید د قربانيانو له کورنيو سره د خواخوږۍ شریکولو په موخه، نن(یکشنبې د تلې په ۲۸مه نېټه) یادې ولسوالۍ ته ولاړ.
د ننګرهار د والي ویاند، عطالله خوګیانی وايي ولسمشر غني به د پېښې د قربانیانو له کورنیو سره وګوري.
د ننګرهار ولایت د هسکې مېنې ولسوالۍ "جَودَرې" سیمې په یوه جومات کې پرلهپسې دوو چاودنو د ۷۲کسانو ژوند واخیست.
د ننګرهار د ځايي چارواکو په وینا، چاودنې له غرمې وروسته (جمعه د تلې په ۲۶مه) د یوې نیمې بجې په شاوخوا کې هغه مهال رامنځته شوې چې لمونځ کوونکي د جمعې د لمانځه د ادا کولوپه حال کې وو.
په دې پېښه کې ۳۲ تنه نور ټپیان شول.
د پېښې شاهدان وايي چې د دغې پېښې له امله د دغه جومات چت رالوېدلی دی.
تراوسه هېڅ ډلې د دغې پېښې مسوولیت نه دی منلی.