په افغانستان کې د نړیوال بانک پخوانی رییس، ویلیم برد وايي د افغانستان حکومت او د لویو بهرنیو مرسته کوونکو ترمنځ له اختلافات شته.
دی د اختلافونو لامل نړیوالو ناستو کې د افغانستان حکومت لخوا د اقتصادي پرمختګ لپاره د یوه جانبه وړاندیزونو او همداراز په مالیې، سوداګرۍ او صنایعو او کانونو وزارتونو کې د ناڅاپي بدلون له امله بولي چې ولسمشر غني لخوا د ټاکنو په درشل کې اصلاحات نه بلکې د سیاسي موخو لپاره دا بدلونونه راغلي دي.
برد د اختلافونو د حل غوښتنه کړې او ویلي یې دي چې که دا اختلافات حل نشي، نو د سولې لرلید به له ګواښ سره مخامخه کړي.
«افغانستان ته د مرستو پر سر ترینګلتیا د سولې لرل له ګواښ سره مخ کوي» دا د هغه مطلب سرلیک دی چې افغانستان کې د نړیوال بانک د پخواني رییس او د امریکا د سولې د انسټيټیوټ د اوسني مخکښ څېړونکي له لوري لیکل شوی دی.
هغه په دغه مطلب کې وایي چې که څه هم له طالبانو سره له یوې احتمالي هوکړې وروسته له افغانستان سره د نړیوالو مرستو دوام د بحث وړ دی؛ خو له افغانستان سره د مرسته کوونکو په ډېری ناستو کې کابل حضور نه دی لرلی.
هغه له دې منځه د پنجشنبه په ورځ په لندن کې له افغانستان سره د مرستو د دوام د تګلارې د جوړولو لپاره د مرستندویانو یوې غونډې ته اشاره کوي چې د افغانستان حکومت پکې ګډون نه درلود.
دا لومړی ځل دی چې په تېرو اتلسو کلونو کې د افغان حکومت استازي په دې غونډه کې ګډون نه درلود.
ویلیم برد د مرستندویانو او افغان حکومت تر منځ د اړیکو د پرې کیدو لامل په کلیدي وزارتونو کې ناڅاپي بدلونونه له هغې جملې د مالیې د وزیر ګمارل او په سوداګرۍ او صنایعو وزارت او دغه راز کانونو او پټرولیم وزارت کې د ولسشمر غني له لوري بدلونونه بولي.
د هغه په وینا دا ګام دا انګیرنه چې اقداماتو یې تر ډیره د ولسمشرۍ ټاکنو په درشل کې سیاسي انګیزه لرلې ده پیاوړي کوي.
په افغانستان کې د نړیوال بانک رییس، ویلیم برد څرګندوي:«زه فکر کوم کله چې د ټاکنو ترسره کیدو ته یوازې یو کال یا تر یو کال کم واټن پاتې وي؛ د وزیرانو ادلون بدلون بله معنا نه ورکوي ؛ مګر دا چې دا ادلونونه او بدلونونه سیاسي انګیزه ولري.»
ویلیم برد وایي چې د افغانستان د حکومت او مرستندویه هېوادونو تر منځ اختلافونه په لومړی سره کې په دوه زرو اتلسم کال کې په ژنیو کې پېل شول.
نوموړی د هغو لامل د افغانستان د ودې او پراختیا په تړاو یو اړخیز وړاندیزونه ګڼي ؛ په داسې حال کې چې د هغه په وینا دا کار له نړیوال بانک سره په ګډه له افغانستان سره د مرستو د دوام لپاره په غونډو کې کیږي.
ویلیم برد د افغانستان د ملي تدارکاتو د کمیسیون پر غونډو د امریکا متحده ایالتونو نیوکې ته په اشارې سره وایي.
ښاغلی ویلیم برد وايي:«د تدارکاتو په څیر د یوې ادارې فعالیت خطر دا دی چې تاسو هغه متمرکز کوي. د دغه فعالیت متمرکز کول فساد متمرکزه کوي.»
هغه وړاندیز کوي چې مرستندوی هېوادونه باید افغان حکومت په نژدې راتلوونکې کې بهر وباسي او افغان حکومت هم باید د مهمو وزارتونو او ادارو له سیاسي کولو لاس واخلي او یوه د ټولنې یوې سټراټيژیکې او اقتصادي مدیریت تګلارې ته ستون شي.