د هلمند په موسي کلا ولسوالۍ کې د هوايي بریدونو په پایله کې د ولسي وګړو مرګ ژوبلې غبرګونونه غبرګونونه راپارولي دي.
د قرباني شویو کسانو خپلوانو د شېشنبې په ورځ (د تلې په ۲مه) په یوې اعتراضي غونډه کې د ځينو هغو قربانیانو مړي راټول کړي چې د یکشنبې په شپه د دولتي ځواکونو په هوايي او ځمکنیو بریدونو کې د موسی کلا بازار ته نږدې وژل شوي دي. په قربانیانو کي ښځي او ماشومان هم شامل دي.
هغوی وايي چې د دغې پېښې ډېری قربانیان هغه کسان دي، چې د یو واده په مراسمو کې يې ګډون کړی وو.
سمیعالله چې په دغې پېښه کې يې څو تنه خپلوان وژل شوي او یوه خور يې هم ټپي ده، چې ټپیان یې لښکرګاه ښار یو روغتون ته راوړي، څرګندوي، د شپې لس بجي وې چې برید ورباندې تر سره شو.
د هلمند موسی کلا ولسوالۍ اوسېدونکی سمیع الله څرګنده کړه:«یو وراره مې هم شهید شوی دی، او درې ته خپلوان مو هم شهیدان شوي، د تره لور مې، او د کاکا لمسی او خور مې ټپيان شوي دي.»
د موسی کلا اوسېدونکی نجیب الله هم وویل:«هلته چې برید وشو ټول ماشومان او ښځې وې هغه کور کې یوازې زه نرینه وم نور ټولې ښځې وې.»
د هلمند د موسی کلا بل اوسېدونکی محمد رفیق د یوې اوه کسیزې کورنۍ د غړو د وژل کېدو په اړه خبرې کوي، او وايي چې د هغې کورنۍ څخه یوازې یو ماشوم ژوندی پاته دی.
محمد رفیق زیاته کړه:«د عبدالرحمان کورنۍ ټول غړي شهیدان شوي او یوازې یو ماشوم یې ژوندی پاتې دی نور ټوله کورنۍ یې وژل شوې ده.»
دلته په لښکرګاه ښار کې د خلګو له لوري لاریون هم تر سره شو.او له امنیتي ځواکونو څخه د عملیاتو پر مهال د پاملرني غوښتونکي دي.
د هلمند قومي مشر امیر محمد اخندزاده په دې اړه وویل:«ایا دا ستاسو ماشومان نه دي؟ زه پر نړیوالې ټولنې او طالبانو غږ کوم چې وژنه پای ته ورسوئ.»
هلمند کې د مدني ټولنې فعال عبدالحق وايي:«د دغه حالت دوام زموږ لپاره د منلو نه دی، تاسې وګورئ چې د شپږو تنو لپاره څلوېښت تنه وژني.»
د دغه برید په اړه د افغانستان د بشري حقونو د خپلواک کمېسیون هم غبرګون ښودلی دی.
د افغانستان د بشري حقونو د خپلواک کمېسیون استازې لطیفه سلطاني وویل:«د بشري حقونو کمېسیون لپاره د مُلکي تلفاتو زیاتوالی د اندېښنې وړ دی او د جګړې له ښکېلو لورو زموږ غوښتنه دا ده چې د ولسي وګړو ژوند ته دې پاملرنه وکړي.»
د هوايي ځواکونو یو پخواني قوماندان وایي د مجازاتو نشتون او کمزوري استخبارات د دا ډول بریدونو اصلي لاملونه دي.
پخوانی پوځي عتیق الله امرخېل څرګندوي:«بې تفاوتي له یوې خوا، د امرینو له خوا د امر نه اجرا کېدل او د مجازاتو نه شتون له بلخوا او همدارنګه په کشفي او استخباراتي برخه کې کمزورتیا باید ووایوو چې له جګړې په پرېکنده توګه تحلیل شتون نهلري.»
خو د ملي دفاع وزارت وايي چې د یادې پېښې په اړه به څېړني وکړي.
د ملي دفاع وزارت د ویاند مرستیال فواد امان وايي:«موږ په موسی کلا کې بهرنیو ترهګرو او په القاعده شبکې پورې تړلو کسانو ته درنه مرګ ژوبله اړولې ده. او ولسي وګړو ته د مرګ ژوبلې په اړه ادعاګانې به په جدي توګه وڅېړو.»
د ملي دفاع وزارت زیاتوي چې په همدغه عملیاتو کې د طالبانو ۲۲ تنه غړي، د پنځه تنه پاکستانیانو په ګډون وژل شوي دي.
خو د هلمند ولایتي شورا بیا څرګندوي چې په یاده پېښه کې ۴۰ تنه ملکي کسان وژل شوي. او ۱۶ تنه نور ټپیان دي.