په کندهار ولایت کې د یوه مسافر وړونکي موټر د چپه کېدو په پایله کې، شپږ تنه وژل شوي او ۱۲ تنه نور ټپيان دي.
د کندهار ځايي چارواکي وايي چې دا پېښه نن سهار (شنبې د وږي په ۲مه) د دغه ولایت په میوند ولسوالۍ کې رامنځته شوې ده.
د کندهار د ټرافیکو مدیریت مرستیال سردار محمد ناصري وايي چې د وژل شویو په منځ کې درې ښځې او دوه ماشومان هم شامل دي.
ښاغلی ناصري همدارنګه زیاتوي چې دا مسافر وړونکی موټر د چلوونکي د بې احتیاطۍ له امله چپه شوی دی.