د انعکاس راډیو ټلوېزیون رییس زلمی لطیفي نن سې شنبې (د کب په ۱۲مه) څرګنده کړه چې د دغې رسنۍ درې تنه ښځينه کارکوونکې په دوو جلا وسله والو بریدونو کې وژل شوې دي.
ښاغلي لطیفي زیاته کړه چې ناپېژانده وسله والو د دغې رسنۍ د دوبلې د برخې دوه تنه کارکوونکې سعدیه او شهناز نن له غرمې وروسته د څلورو بجو په شاوخوا کې د ننګرهار ولایت د مرکز جلال اباد ښار په لومړۍ حوزه کې په نښه شول او دواړه له ټپي کېدو وروسته په روغتون کې ساه ورکړه.
هغه همدارنګه څرګندوي چې په ورته برید کې د جلال اباد ښار په څلورمه حوزه کې د انعکاس ټلوېزیون د دوبلې د برخې بله کارکوونکې مرسل حبیبي هم وژل شوې ده.
ورته مهال د جلال اباد په ولایتي روغتون کې ډاکټران وايي چې په دغه برید کې دوه تنه لاروۍ ښځې هم ټپیانې شوې دي او د درمنلې لپاره دغه روغتون ته راوړل شوې دي.
تراوسه د دغو بریدونو مسوولیت چا نه دی منلی.
کابو درې میاشتې مخکې هم د انعکاس ټلوېزیون د خپرونو چلوونکې ملاله میوند هم په ورته برید کې ووژل شوه.