د بغلان د پوهنې ریاست مسوولان وایي، د هلکانو او نجونو له ښوونځیو یې د نارینه او ښځینه ښوونکو د بېلوالي بهیر پیل کړی دی.
دوی ټینګار کوي چې وروسته له دې نارینه ښوونکي نجونو او ښځینه ښوونکې هلکانو ته تدریس نهشي کولی.
د دوی په خبره، د دې بهیر په عملي کېدو سره به ښوونکي خپلې دندې له لاسه ور نهکړي.
د بغلان د پوهنې رییس نور محمد عزیزي وايي: «دا وېره چې د ښوونکو په منځ کې پیدا شوې چې برخلیک به یې څه کېږي، موږ دې ښوونکو ته ډېرو خالي ځایونو کې اړتیا لرو.»
عبدالشکور رحماني چې له پنځلسو کلونو راهیسې د پلخمري ښار په بېلابېلو ښوونځیو کې د ښوونکي په توګه کار کوي، وایي، په دې موده کې یې په خورا کمه تنخوا کار کړی دی او اوس اندېښنه لري چې د ښځینه او نارینه ښوونکو په بېلوالي سره یې لرې پرتو سیمو ته و نه لېږي.
عبدالشکور پهدې اړه طلوعنیوز ته وايي: «که دا ګام پورته کېږي، باید امتیاز هم ولري، څو د ښوونکو ستونزه ورسره حل شي.»
په همدې حال ښځینه ښوونکې د هلکانو له ښوونځیو د بېلوالي په پار بېلابېل نظرونه لري، خو یو شمېر یې وېره لري چې پهدې کار سره خپلې دندې له لاسه ور نهکړي.
ښوونکې رینا امیري وايي: «د اندېښنې وېره دا ده چې دا پروسه تر شپږم ټولګي پورې ده او له دې پورته نهده، په همدې خاطر پهدې فکر کې دي، ګوښه نهشي.»
ښوونکې نذیره وايي: «نارینه او ښځینه دې له یو بل جلا شي، موږ ډېر خوښ یوو.»
د بغلان د پوهنې ریاست مسوولان زیاتوي، د ښوونکو د جلا کولو پلان چمتو شوی او د دې بهیر په پلي کېدو سره به د بغلان ښوونکي له دندو ګوښه نهشي.
دا په داسې حال کې ده چې دا مهال یو شمېر ولایتونو کې ښځینه ښوونکې هلکانو او نارینه ښوونکي نجونو ته درس ورکوي.
په دې اړه مو اندونه