په خوست کې د ځينو کارخونو مسوولان وایي، چې په دې وروستیو کې د برېښنا پرچاوۍ او په خامو موادو لوړ ګمرګ اخیستو له ستونزو سره مخ کړي دي.

دوی له اسلامي امارته غوښتنه کوي چې د یادو ستونزو د حل لپاره دې کوټلي ګامونه واخلي.

د کارخونې لرونکی رحمت الله وايي:«ګمرک د المونیم خام توکي لوړ کړي موږ ته توکي په ډېره لوړه بیه راځي.»

د کارخونې لرونکي خواني هم وویل:«توکي موږ ته په ډېره لوړه بیه راځي زموږ ټول خام توکي له ایران او پاکستان څخه دي.»

د کارخونو مسوولانو له اسلامي امارت غواړي چې یادې دواړه ستونزې دې په وخت ورته هوارې کړي څو ټکنۍ شوې چارې یې بېرته منظمې شي.

د کارخونې لرونکی رحمن الله څرګنده کړه:«زموږ ستره ستونزه همدا ده چې برېښنا خو هېڅ نشته او د توکو بیه ډېره لوړه ده.»

د کارخونې لرونکی امیرګل هم وايي:«دلته باید برېښنا ۲۴ ساعته وي که چېرې نه وي د ورځې له خوا باید برېښنا ولرو.»

په همدې حال کې د خوست د اطلاعاتو او کلتور ریاست چارواکي وایي، په خامو موادو د د لوړ ګمرګ اخیستو موضوع په مرکزي کچه تر بحث لاندې ده او د برېښنا د پرچاوۍ ستونزه به هم  ژر حل شي.

د خوست د اطلاعاتو او کلتور ریاست رییس شبیراحمد عثماني په دې هکله وايي:«د برېښنا مرکزي دفتر او د دغه شرکت چارواکي هڅه کوي چې د پروچاوۍ ستونزه حل کړي.»

خوست کې دا مهال د بېلابېلو توکو سل ګونه کارخونې فعالیت کوي چې په دې وروستیو کې یې ځینې د بېلابېلو ستونزو له امله تړل شوې دي.

عام باور دا دی چې که ستونزو ته په وخت رسېدنه ونه شي، ښایي یو شمېر نورې کارخونې هم وتړل شي.