د افغانستان د زعفرانو ټولنه وایي، د زعفرانو د ګل په دغه فصل شاوخوا ۵۰ زره تنو ته لنډمهالې کاري زمینه برابره شوې چې ۹۵ سلنې یې ښځې دي.
د مسوولینو په خبره، د زعفرانو ګل راټولول او نږدې ټول پروسس یې د ښځو او نجونو له لوري ترسره کېږي.
د افغانستان زعفرانو ټولنې مسوول، محمد ابراهیم عادل و ویل: « د زعفرانو کار ۹۵ سلنې د ښځو له لوري ترسره کیږي ځکه دا ګیاه پاملرنې او حوصلې ته اړتیا لري. د ګلونو جلا کول او پروسس یې تر ډېره د ښځو پورې اړه لري.»
د زعفرانو کروندګر، عبدالشکور احراري و ویل: « له راټولولو تر وچولو د زعفرانو ۸۰ سلنې کار د ښځو پورې اړه لري، ځکه کاري وړتیا لري ښځې دغه کار له ډېرې پاملرنې سره ترسره کوي.»
ځینې دغه ښځې چې د زعفرانو په کروندو کې په کار بوختې دي وایي، له دې ځایه ترلاسه کېدونکی عاید د خپلو کورنیو لګښتونه پوره کوي.
دوی د نجونو او ښځو پر وړاندې د زده کړو او کار تر بندیز وروسته د زعفرانو دغه لنډمهالي کار ته مخه کړې ده.
د هرات اوسېدونکې، ریزه ګل وایي: « پنځه یا شپږ ورځې کیږي چې دلته کار کوم. هر څه چې وګټم کور کې مې ماشومانو ته وړم.»
د زعفرانو په یوه شرکت کې کارکوونکې، الناز و ویل: « بې کاري ډېره سخته ده. دلته چې راځم نورو نجونو سره خبرې کوم او په ورته وخت کې کور لپاره عاید هم کیږي.»
د زعفرانو ګل راټولولو فصل هرات کې له شل ورځو تر یو میاشتې وخت نیسي خو د زعفرانو پروسس دې ښځو ته لا زیات کاري فرصتونه برابر کړي دي.