د برېښنا شرکت مسوولین وایي، د ۴۰۰ میګاواټه وارداتي برېښنا پرې کېدو سره، دې شرکت ته، د هر ساعت په حساب دوه میلیونه او ۷۰۰ زره افغانۍ تاوان اوړي.
د برېښنا شرکت د معلوماتو پر بنسټ، ټاکل شوې، چې نن (پنجشنبه د غبرګولي په ۱۳ مه) د کابل قرهباغ ولسوالۍ کې د پرې شوې برېښنا مزي بېرته ونښلول شي.
د پروان په سالنګ کې د برېښنا د دوو ستنو د نړولو تر ناکامې هڅې څلور ورځې وروسته، ناپېژاندو کسانو د سهشنبې پر شپه، د کابل قرهباغ ولسوالۍ کې د برېښنا یوې ستنې ته چاودنه ورکړه. په تېره څه کم یوه میاشت کې، دا د برېښنا ۱۱ مه ستنه ده، چې د کابل شمال او پروان کې په نښه شوې.
له پینځو ولایتونو د برېښنا شرکت تخنیکي کارکوونکي د کابل قرهباغ ته د برېښنا د دغې ستنې، بېرته رغولو لپاره ورغلي دي.
په دې هکله د برېښنا شرکت د لوړ ولټاژ عمومي امر خوشحال صافي ویلي: "موږ ته دوه ډوله تاوان اوړي. یو د برېښنا د پرچاوۍ له اړخه تاوان دی، چې زموږ د سوداګرۍ څانګې اړوندېږي. بل د تجهیزانو او فزیکي کار تاوان دی، چې یوازې د دې ستنې نړېدو له کبله شاوخوا ۱۰۰ زره ډالر تاوان رارسېدلی. "
برېښنا شرکت له ترکیې، هند او ایران څخه د برېښنا ستنې راواردوي او په کور دننه یې تړي.
برېښنا شرکت د هر کال په حساب، د ۳۰۰ میلیونه ډالرو په ارزښت برېښنا پېري.
د وارداتي برېښنا پرې کېدل، نه یوازې دا چې په برېښنا شرکت د برېښنا پېرلو بېځایه پیسو بوج راوړي، بلکې نورو بېلابېلو تاوانونو سره یې هم مخامخوي.
په دې هکله د برېښنا شرکت ویاند سنګر نیازي ویلي: " د ۴۰۰ میګاواټه برېښنا پرې کېدو سره، د هر ساعت په حساب، برېښنا شرکت ته ۲.۷ میلیونه افغانۍ تاوان اوړي. "
د برېښنا پرې کېدل عامو خلکو ته هم سرخوږی جوړوي، قرهباغ ولسوالۍ کې د حسیب الله په نوم یو بڼوال وایي، د برېښنا ستنې ته چاودنې ورکولو سره یې نږدې ۴ سوه زره افغانۍ تاوان کړی.
حسیب الله ویلي: " د انګورو هره ځېلۍ ۱۰ زره افغانۍ ارزښت لري. تر کومه چې مې حساب کړی، د برېښنا د ستنې نړېدو سره د انګورو لسګونه ځېلۍ وچې شوې دي. د بڼ دېوال یې هم (د برېښنا د ستنې د بېرته جوړولو د وسایلو ځای پر ځای کولو) له کبله نړولی دی. "
په ټوله کې تېرو دوو میاشتو کې، په کابل، پروان، کاپیسان، کندوز او بغلان کې، د برېښنا ۲۰ ستنو ته چاودنې ورکړل شوې دي.