د مالیې وزارت له ګاوندیو هېوادونو د سوداګریزو توکو د قاچاق د مخنیوي لپاره د هېواد په ټولو سرحدونو کې بازارګي تړلي دي.
د مالیې وزارت ویاند احمد ولي حقمل وايي چې کابینې دا پرېکړه کړې ده.
ښاغلی حقمل طلوع نیوز ته وویل:«د بازارګیو موضوع ډېره مهمه وه. دا موضوع کابینې ته ولاړه او پرېکړه وشوه چې دغه بازارګي باید وتړل شي. ځکه چې هلته خلکو استفاده کوله او توکي د پولې یوې خوا بلې خوا ته قاچاق کول.»
د سوداګرۍ او پانګونې خونه وايي چې په بازارګیو کې کابو ۴۰۰ تنه په کار بوخت دي او له دغو لارو د توکو قاچاق د هېواد د عوایدو د کمېدو لامل کېږي. د دغې خونې چارواکي وايي چې په سرحدونو کې د بازارګیو له رامنځته کولو څخه موخه په سرحدونو کې د هېوادوالو د ستونزو حل دی. له دغو بازارګیو باید د راکړې ورکړې لپاره استفاده ونه شي.
د سوداګرۍ او پانګونې خونې د مدیره پلاوي غړی خانجان الکوزی وايي:«دا د سرحدي خلکو لپاره وو چې ترې استفاده وکړي، ځکه چې په مرز کې دي، ستونزې لري او مرکزونو ته نه شي راتلای، دغه بازارګي باید سوداګریز نه وي.»
بلخوا د کانونو او صنایعو خونه وايي چې د سرحدي بازارګیو فعالیت او له دغو بازارګیو له لارې د توکو قاچاق هېواد کې د ټيټ کیفیته توکو د زیاتوالي لامل شوی و.
د افغانستان د کانونو او صنایعو خونې لومړی مرستیال سخي احمد پيمان څرګندوي:«د بازارګیو بندول یو نېک اقدام او د صنعتکارانو په ګټه دی، ځکه په تېر کې له دې لارې توکي قاچاق کېدل او د کیفیت کنټرول شتون نه درلود او زموږ ځينو صنعتي سکټورونو له دې اړخه زیان لیده.»
هغه سوداګریز توکي چې په سرحدي بازارګیو کې یې پېر او پلور کېږي، د مالیاتو، ګمرکي ترفو او محصول څخه معاف دي. له همدې امله ځينو ګاونډیو هېوادونو هڅه لري چې له افغانستان سره په پوله سرحدي بازارګي زیات کړي.
په دې اړه مو اندونه