د ښار جوړونې او ځمکې وزارت وايي چې په کابل او نورو ولایتونو کې یې د ۱۳۱ ښارګوټو د جوړونې او بیارغونې لپاره طرحه چمتو کړې ده.
د ښار جوړونې او ځمکو وزارت مسوولین د امارات، قطر او چین له لوري په هېواد کې د یو شمېر دولتي او خصوصي ښارګوټو د جوړونې او بیا رغونې بهیر له پیلېدو خبر ورکوي.
د دغه وزارت سرپرست زیاتوي، دغه بنسټ غواړي په ټول هېواد کې ۱۳۱ ښارګوټي جوړ او ځینې یې بیا ورغوي.
د ښار جوړونې او ځمکو وزارت سرپرست حمدالله نعماني وویل:«د ښارجوړونې وزارت د ۱۳۱ ښارګوټو لپاره پلان جوړکړی دی، ډېری دغه ښارګوټي دولتي دي او شخصي ښارګوټي هم په دغې طرحې کې شاملېږي.»
ښاغلی نعماني زیاتوي، د یادو ښارګوټو اپارتمانونه به پر دولتي کارکوونکو ووېشل شي او پیسې به یې هم د هغوی له معاشونه وضعه شي:«د هغه پیسې په میاشتنۍ بڼه او یا هم په کلنۍ بڼه به جمع شي او کولای شي چې د قسط په بنه هم ورکړي.»
یو شمېر هېوادوال هم له ښارجوړونې وزارته غواړي چې، ولسي وګړو ته هم د اقساتو په بدل کې د اپارتمانونو د ورکړې بهیر پیل کړي.
د کابل یوه اوسېدونکي طلوع نیوز ته وویل:«له اسلامي امارته غواړو چې جوړ شوي او نیمه کاره ښارګوټو کارونه پای ته ورسوي او هغو کسانو ته چې کور نه لري او ځای نه لري ووېشي.»
د ښار جوړونې وزارت همداراز ویلي، د دغو ښارګوټو د جوړولو په پیل سره به سلګونه کسانو ته د کار زمینه هم برابره شي.
په دې اړه مو اندونه