د ټرانسپورټ او هوايي چلن وزارت، د هوايي چلن د نړۍوالۍ ورځې په مناسبت غونډه کې وايي چې د کابل د هوايي ډګر د زیانمن شویو تخنیکي برخو اویا سلنه بېرته فعاله شوې ده.
دغه وزارت زیاتوي هغه برخې چې بېرته فعالې شوې دي د قطر د تخنیکي ډلې په همکارۍ بیارغول شوې دي.
د ټراسپورټ او هوايي چلن وزارت سرپرست حمیدالله اخندزاده وايي:«د هوايي چلن په برخه کې، د متحده عربي اماراتو له ګاک شرکت درې ستر تړونونه لاسلیک کړي دي او تړونونه په ښه به مخته وړل کېږي.»
د دغه وزارت د سرپرست د څرګندونو پر بنسټ، دم ګړۍ د کابل هوايي ډګره د ورځې څه باندې ۳۰ الوتنې کېږي.
ورته مهال د ټرانسپورټ او هوايي چلن وزارت سرپرست غلام جیلاني وفا وايي چې د افغانستان له فضا د ورځې ۸۰ تر ۱۲۰ الوتنې کېږي؛ خو تراوسه هغه مرکزیت چې د ساحوي الوتنو تېرېدل کنټرول کړي، فعال نه دي.
ښاغلي وفا زیاته کړه:«له ۸۰ تر ۱۲۰ پورې الوتنې زموږ په فضا کې ګرځي، خو یوازینی کمښت چې لرو ځينې تجهیزات دي.»
د دغه وزارت د چارواکو په وینا، اوس په هېواد کې ۲۶ هوايي ډګرونه فعال دي چې له دې منځه په پنځو هوايي ډګرونو کې نړۍوالې الوتنې کېږي.
بلخوا د سوداګرۍ او صنعت وزارت وايي چې اسلامي امارت هڅه کوي چې هوايي اروپايي هېوادونو ته د هوايي دهلېزونو له لارې الوتنې هم فعالې کړي.
د سوداګرۍ او صنعت وزارت سرپرست نورالدین عزیزي څرګندوي:«هڅه کوو چې ان شاالله له یو بل سره له دې ډېر هوايي دهلېزونه ولرو هڅه کوو اروپايي هېوادونو ته دهلیزونه پرانیزو، هڅه کوو چې ترکیې ته یې پرانیزو.»
د سوداګرۍ او پانګونې خونې سرپرست محمد یونس مومند هم وايي:«موږ وتوانېدو چې د هوايي چلن، مالیې وزارتونو، په مرستې، په زرګونه ټنه توکي بهر ته واستوو، له چین سره هوايي دهلېز پرانیستل شو او د افغانانو په لاس د افغانستان جنس بهر ته واستول شو چې دا یوه ستره لاسته راوړنه ده.»
د ټرانسپورټ او هوايي چلن وزارت په وینا، دم ګړۍ ایران، ازبیکستان، پاکستان، ترکیې، متحده عربي اماراتو، سعودي عربستان، چین، هند، قطر او کویټ ته په عادي توګه الوتنې ترسره کېږي.
په دې اړه مو اندونه