په سویس کې د افغانستان د اماني صندوق غړی شاه محمد محرابي وايي چې د افغانستان ۳.۵ مېلیارد ډالره شتمني چې د تسویه نړۍوال بانک ته لېږدول شوې، تراوسه یې څه باندې اته مېلیونه ډالره ګټه کړې ده.
د افغانستان د اماني صندوق دغه غړی وايي، لا تر اوسه د دغو پیسو د مصرف د څرنګوالي په تړاو څه پرېکړه نه ده شوې.
ښاغلي محرابي وویل:«د ۲۰۲۲ کال د نومبر له اوومې راهیسې چې، پیسې سویس ته لېږدول شوي د افغانستان دغې شتمنۍ څه باندې ۸ مېلیونه ډالره ګټه کړې؛ خو لاتر اوسه د دغو پیسو د مصرف په تړاو څه پرېکړه نه ده شوې.»
نوموړی زیاتوي، تر دې مخکې د افغانستان ۳.۵ مېلیارده شتمنیو ۳۶ مېلیونه ډالره ګټه کړې وه.
د افغانستان د اماني صندوق غړي زیاته کړه:«د افغانستان له شتمنیو ۳ اعشاریه ۵ مېلیارده ډالره او ورسره ۳۶ مېلیونه ډالره ګټه د ۲۰۲۲ کال د نومبر پر اوومې د نړۍوالو حسابونو د تسویې بانک ته لېږدول شوي او ۳۶ مېلیونه ډالره هغه پیسې دي چې، مخکې له لېږدولو یې ګټه کړې وه.»
د اقتصادي چارو ځینې شنوونکي وايي، د افغانستان شتمنۍ باید په راڼه ډول راټولې شي او د هغې د ګټې په تړاو د راپور ورکړې په موخه یو نړۍوال بنسټ وګومارل شي.
د مالي او بانکي مسایلو کارپوه سیر قریشي وايي:«د افغانستان د دغو اسعاري زېرمو او د کټو په برخه کې یې هر ربع دوی خپل راپور خپور کړي.»
له بل لوري اقتصاد وزارت ووايي، د افغانستان شتمنۍ باید د سرپرست حکومت په واک کې ورکړ شي.
د اقتصاد وزارت تخنیکي مرستیال عبداللطیف نظري څرګندوي:«د افغانستان د خلکو شتمني او همدارنګه د دغو ۳/۵ مېلیارده ډالرو ګټه د اسلامي امارت په واک کې ورکړل شي.»
د ویلو ده چې، د امریکا مالیې وزارت له خپلو نړۍوالو شریکانو سره یو ځای د افغانستان د ۳ اعشاریه ۵ مېلیارده ډالرو شتمنیو د ساتنې لپاره په سویس کې د ساتنې یو صندوق جوړ کړ.
انوار الحق احدي، شاه محمد محرابي، په سویس کې د امریکا سفیر او د سویس د بهرنیو چارو وزارت یو استازی د دغه صندوق د معتمدانو پلاوی دی او ټاکل شوې له ناروې او یا هم له اروپايي ټولنې یو استازی د دغه صندوق د پلاوي غړی شي.
په دې اړه مو اندونه