د کانونو او پټرولیم وزارت وايي چې دغه وزارت پر یو ټن ډبرو سکرو ګمرکي محصول له ۴۵، ۳۰ ډالرو ته راټیټ شوی دی.
د دغه وزارت ویاند وایي چې د ډبرو د سکرو د هر ټن ریالټي تعرفه له ۲۵۰۰ افغانیو نه ۲۲۰۰ افغانیو ته راټيټه شوې ده.
د کانونو او پټرولیم وزارت ویاند همایون افغان وايي:«د ډبرو سکرو نړۍوالې بیې ته په کتو او سوداګرو ته د اسانتیاوو او د پانګوالو د هڅولو لپاره او د ډبرو سکرو د صادراتو د کچې د لوړولو لپاره د کانونو او پټرولیم وزارت په وړاندې او د افغانستان د اسلامي امارت د مشر د حکم پر بنسټ د یو ټن ډبرو سکرو ریالټي له ۲۵۰۰ افغانیو ۲۲۰۰ افغانیو ته راټیټ شوی دی.»
بل خوا د سوداګرۍ او پانګونې خونه وایي تر هغې وروسته چې تېر کال د ډبرو د سکرو تعرفه زیاته شوه، پاکستان ته د هغو صادرات د پاموړ کم شوي دي.
د سوداګرۍ او پانګونې خونې لومړی مرستیال محمد یونس مومند وویل:«د افغانستان د ډبرو سکرو پر صادراتو ۱۵ ډالره مالیه کمه شوې، دا به د ډبرو سکرو په صادراتو کې بدلون راولي، اوس پاکستان ته له نورو هېوادونو په ځانګړې توګه له افریقا څخه ډبر سکاره واردوي. دا د افغانستان د ډبرو سکرو لپاره ښه بازار دی او د ډبرو سکرو د ټرانزیټ په برخه کې هم باید اسانتیاوې رامنځته شي چې موږ وکړای شو د ډبرو سکاره نورو هېوادونو ته هم صادر کړو. زموږ غوښتنه دا ده چې په دې برخه کې دقت وشي او نړۍوال نرخ ته پاملرنه وشي.»
بل پلو، د صنعت او سوداګرۍ وزارت شمېرې ښيي، چې د روان لمریز کال په لومړیو څلورو میاشتو کې بهر ته نږدې ۵۰۰ زره ټنه د ډبرو سکاره صادر شوي دي.
د صنعت او سوداګرۍ وزارت ویاند آخندزاده عبدالسلام جواد وايي:«د روان لمریز کال په څلورو لومړنیو میاشتو کې د ۹۵ مېلیون ډالرو په ارزښت ۴۹۷ زره ټنه د ډبرو سکاره صادر شوي دي.»
تر دې وړاندې د کانونو او صنایعو خونې ویلي و، چې د کانونو په تېره بیا د ډبرو د سکرو استخراج په مسلکي ډول ترسره کېږي او صادرات یې هم د زرګونه تنو لپاره د کار زمینه برابروي.
په دې اړه مو اندونه